«Астана» мен «Жетісу» арасындағы Freedom QJ League W ойыны – Лига тарихындағы ең нәтижелі матч болды!

Матчтағы интрига алғашқы он минутта-ақ жойылды – таблода 3:0 есебі тіркелді. Ал соңғы ысқырыққа дейін соғылған доптар саны жиырмаға жуықтады. «Жетісу» осындай гол нөсеріне тек Нурай Болатованың қос голымен жауап бере алды.

Бұл ойында ең көп гол соққан Асыл Пазыл болды – оның еншісінде бес гол мен үш нәтижелі пас. Сондай-ақ Әльзия Жамбыл (покер), Софья Рыбак (3+3) және Зарэма Максот (3+1) ерекше көзге түсті. Ляйсан Биккинина мен Айнель Сманова да бір-бір голдан соқты.

Бұл матч Freedom QJ League тарихындағы ең нәтижелі ойын ретінде тіркелді – ол бұған дейінгі рекордты артта қалдырды. Бұрынғы рекорд өткен жылы U-17 B санатындағы «Жетісу» мен «Ұлытау» арасындағы кездесуде тіркелген еді – сол ойында талдықорғандықтар өз алаңында қарсыластар қақпасына жауапсыз 13 гол соққан болатын.