Үш жыл қатарынан: Freedom QJ League ардагерлері

Ал Лиганың өз рекордшылары да бар – қатарынан үшінші жыл бойы қатысып келе жатқан ойыншылар бүгінде оның нағыз ардагерлеріне айналды.

Бұл топтағы басты жұлдыз – «Шахтер» клубының ойыншысы Глеб Макридов. Ол алғаш рет Лигада 16 жасында өнер көрсетіп, бірден негізгі құрамдағы маңызды ойыншылардың біріне айналды. 2023 жылғы маусымда Глеб 12 матч өткізіп, 2 гол соқты және 1 нәтижелі пас берді. Оның бір голы турдағы ең үздік гол деп танылды. Келесі жылы да ол осы марапатты қайта иеленді. 2024 жыл Макридов үшін нағыз серпіліс жылы болды: 22 матч, 5 гол және 3 ассист.

Биылғы маусым – оның Лигадағы соңғы маусымы, себебі ол жас шектеуіне жетті. Алайда алғашқы үш турда-ақ ол өз мұрасын бекемдей түсуге бел буғанын көрсетті – 3 гол және 1 нәтижелі пас.

«Қайрат» шабуылшысы Азамат Тұяқбаев та ерекше назарға лайық. 2023 жылы ол небәрі 4 матчта ойнап, барлығы 100 минут алаңда болды және бір нәтижелі пас берді. Алайда екінші маусымда жарқырап көрінді: 18 матчта 18 гол мен 8 пас – әсерлі көрсеткіш.

Freedom QJ League екі дүркін чемпионы әрі «Црвена Звездамен» өткен QJL All-Star матчына қатысушы ретінде ол Fantasy турниріндегі ең қымбат футболшылардың біріне айналды. Алайда әзірге тек үшінші турда ойнап, «Ертіске» қарсы матчта бір гол мен бір паспен көзге түсті.

«Ақтөбе» клубының жартылай қорғаушысы Роберт Асрян да қатарынан үшінші маусымын өткізіп жатыр. 2023 жылы ол 5 матчта бар болғаны 28 минут ойнады. Бірақ 2024 жылы бапкерлер оған үлкен сенім білдіріп, ол 16 матчта 1253 минут өткізді, 2 гол және 2 нәтижелі пас жасады.

Freedom QJ League  алғашқы маусымынан бастап көзге түскен тағы екі ойыншы – «Астана» қорғаушысы Абзал Сағын және жартылай қорғаушы Алан Азамат. Олар тиісінше 3 және 5 матч өткізген болатын. 2024 жылы екеуі де негізгі құрамда ойнады: Абзал – 20 матчта 8 гол мен 4 пас (барлығы 12 ұпай), Алан – 22 матчта 6 гол мен 4 пас (10 ұпай). Биылғы маусымда да олар «Астанаға» пайдасын тигізіп үлгерді – бірінші турда Сағын «Атырау» қақпасына гол соқты, ал оған нәтижелі пас берген – Алан Азамат.

Ал «Каспий» қақпашысы Арнат Бекетаев үшін де бұл үшінші маусым. Ол 2023 жылы үш, 2024 жылы алты матчқа қатысты. Бұрынғы маусымдарда матчтарды жартылай ғана ойнағанымен, биыл ол екі ойынды толығымен өткізіп, негізгі қақпашылардың біріне айналды.

Қазіргі уақытта тіркелгенімен, әлі ойынға шықпаған футболшылар да бар: «Шахтер» шабуылшысы Руслан Белобородый (2023 жылы – 4 матч, 2024 жылы – 22 матч, 3 гол және 2 пас), сондай-ақ қақпашылар Даниил Ефременко («Ертіс», бұрын – «Ақсу», 2023 жылы – 3 матч, 2024 жылы – 16 матч) және Шерхан Қалмұрза («Қайрат», 2023 жылы – 8 матч, 2024 жылы – 17 матч). Маусым енді ғана басталды – демек, олардың да Freedom QJ League алаңына қайта оралуы әбден мүмкін.