Freedom QJ League-ға үш жыл: логистика, білім беру және жаттықтырушыларға арналған цифрлық экожүйе қалай қалыптасты

Осы үш маусымның артында Лиганың жарыс процесін тікелей ұйымдастырумен айналысатын қызметкерлері мен спорттық-сараптамалық бөлімнің сарапшылары атқарған ауқымды еңбек тұр. Назарларыңызға осы кезеңдегі ұйымның басты жетістіктеріне шолу ұсынамыз.

Логистика және күнтізбе

Freedom QJ League жарыстарына қатысатын клубтар тек өз алаңындағы матчтарды ұйымдастыру шығындарын көтереді. Ал қалғанының барлығы — қонақ командалардың логистикасы, тамақтануы мен жайлы қонақүйлерде тұруы — Лига тарапынан ұйымдастырылып, қаржыландырылады.

Бұл — жарыстарды ұйымдастыру және өткізу бөлімі үшін үлкен сын. Әсіресе жарыстар саны артқан сайын матчтар мен футболшылар саны да экспоненциалды түрде өсіп келеді. Үш жыл ішінде Лига командалары 980 әуе рейсін, 197 пойыз сапарын және 454 автобуспен жол жүруді жүзеге асырды.

Ойыншылар, жаттықтырушылар мен төрешілер футбол командасына қажетті барлық жағдай жасалған қонақүйлерге орналастырылады: бір, екі және үш орындық бөлмелер, Лига бекіткен мәзір бойынша күніне үш рет теңгерімді тамақтану, сондай-ақ теориялық сабақтарға арналған конференц-залдар бар.

«Бұрын бәрі қарапайым еді: ойыншылар да, штаб та бірге барып, бірге қайтатын. Қазір А лигасындағы командаларда жағдай күрделірек — бәрі бір рейспен ұша алмайды, әкімшілік штабты бөліп жіберуге тура келеді.

U-16 командасымен бірге міндетті түрде әкімші, дәрігер, медиа-офицер, координатор, қақпашылар жаттықтырушысы болуы тиіс. Жас команда ойынын аяқтап, ұшып кетуі мүмкін, ал осы қызметкерлер қалып, стадионда, қонақүйде, әуежайда бар жұмысты соңына дейін реттеп шығады», — деп түсіндірді Лиганың travel-менеджері Әмір Есеркепов.

2025 жылы А лигасында (U-18, U-17, U-16) 36 команда өнер көрсетті. Freedom QJ League B-да 10 команда, ал қыздар арасындағы алғашқы турнирге 8 клуб қатысты. Жалпы есепте — 54 команда, 542 матч және 1 620 ойыншы. Осындай күрделі жағдайда жарыстарды сапалы өткізу үшін жылдық күнтізбені дұрыс құрастыру аса маңызды.

Сонымен қатар, Лига әр маусым алдында регламент жобасын жетілдіріп отырады — жинақталған тәжірибе мен кері байланысты ескере отырып.

Үздіксіз білім беру

Үш жыл бойы Лиганың спорттық-сараптамалық бөлімі жаттықтырушыларға арналған оқу семинарларын белсенді түрде ұйымдастырды. Барлығы 17 семинар өткізіліп, олар еліміздің әртүрлі өңірлерінде өтті.

Семинарлар теориялық, аналитикалық және практикалық материалдарға толы болды. Спикерлер қатарында тек ССБ сарапшылары ғана емес, шақырылған мамандар да болды.

Сарапшылар командаларды тек Лига матчтарында ғана емес, маусым алдындағы турнирлерде де бақылап отырды. Жиналған деректер талданып, жаттықтырушыларға арналған егжей-тегжейлі статистикалық есептерге айналды әрі семинарлар барысында пайдаланылды.

Сонымен қатар, семинарлар жаттықтырушыларға бейресми ортада кездесіп, тәжірибе алмасуға мүмкіндік берді.

«Болашақ ойыншысы» және «Болашақ жаттықтырушысы» бағдарламалары

Өткен маусымда спорттық-сараптамалық бөлім «Болашақ ойыншысы» және «Болашақ жаттықтырушысы» жобаларын іске қосты.

Бұл бағдарламалар аясында әртүрлі клубтардан болашағы зор жас ойыншылар мен жаттықтырушылар іріктеліп, олардың әлеуетін ашуға қосымша мүмкіндіктер берілді.

«Болашақ ойыншысы» жобасы перспективалы футболшыларды жеке сүйемелдеуді көздеді. Ал «Болашақ жаттықтырушысы» бағдарламасында қатысушыларға маусым бойы әдістемелік қолдау көрсетіліп, талдау мен жоспарлау жұмыстарына көмек берілді.

«Біздің мақсатымыз — ойыншылардың тактикалық ойлауын дамытып, дербес шешім қабылдай алатын, кәсіби мансапқа толық дайын футболшыларды қалыптастыру. Ал жаттықтырушыларға келсек, олардың біліктілігін арттыруға ынталандыру және нақты қолдау көрсету маңызды», — деді ССБ сарапшысы Евгений Яровенко.

Жобалардың шарықтау шегі — Алматыда өткен QJL All Star матчы болды. Лиганың үздік ойыншылары Испанияның атақты академиясымен тең ойнап, тек пенальти сериясында ғана жеңілді.

Біртұтас цифрлық экожүйе

Freedom QJ League жасөспірімдер футболына заманауи цифрлық технологияларды белсенді енгізіп келеді. Командалар Hudl компаниясының Wyscout жүйесіне қол жеткізе алады, ал Лига сайтында әр ойыншы мен матч бойынша кеңейтілген статистика бар.

2024 жылы таныстырылған FF Manager жаттықтырушыларға арналған цифрлық платформасы ерекше назар аударады. Ол жаттығуларды ыңғайлы конструктор арқылы жоспарлауға және қазақ, орыс, ағылшын тілдеріндегі әдістемелік база арқылы білімді толықтыруға мүмкіндік берді.

Платформа Tagline Awards, MARSPO Awards және Workspace Digital Awards сияқты беделді халықаралық digital-сыйлықтарды иеленді.

Сонымен қатар, өткен маусымда Лига Freedom Telecom және BigBro компанияларымен бірлесіп «ақылды» камераларды жаттығу процесіне енгізу жобасын іске қосты.

«Жаттықтырушы камераны бір батырмамен жоспарлап қояды, ал FF Manager барлық деректі автоматты түрде жібереді. Жаттығудан кейін сарапшылар бейнені қарап, кері байланыс береді, ал BigBro ойыншылардың техникалық-тактикалық және фитнес деректерін талдайды», — деді ССБ жетекшісі Арсен Инкарбеков.

Бастапқыда жоба Астана, Шымкент және Қарағандыда іске қосылды. Алдағы уақытта оны Қазақстанның басқа өңірлеріне де кеңейту жоспарланып отыр.

Үшжылдық циклдің аяқталуы — маңызды кезең. Алайда Лига дамуды тоқтатпайды. Алдағы маусымда U-15 жас санаты командалары қосылады деп күтілуде. Сонымен қатар, Қазақстан футбол федерациясы Freedom QJ League-ке юниорлық жарыстарды кемінде 2028 жылға дейін өткізу құқығын ұзартты. Болашақ жоспарлар — ауқымды.