Жарқын ойындар мен символикалық соңғы қоңырау: Freedom QJ League 6-турынан не білу керек

«Қайрат» алшақтығын арттырды

«Сары-қаралар» «Тобылмен» өткен үш ойында да еш қиындық көрмеді. U-16 командалары арасындағы матч 10:1 есебімен аяқталса, 2009 жылы туған «қайраттықтар» сегіз жауапсыз гол соқты. Ал басты турнирде ысқырықтан кейін таблода 6:1 есебі тіркелді.

Ерекше атап өтетін жайт – 14 жастағы Роман Черноморец, лига тарихындағы ең жас дебютанттардың бірі, U-17 сапында дубль жасады. Ал бас турнирдің үздік сұрмергені Абылай Төлеухан тағы екі гол соғып, жалпы көрсеткішін 8 гол және 3 нәтижелі пасқа жеткізді. Ол қазіргі таңда «гол+пас» жүйесі бойынша чемпионат көшбасшысы.

Сонымен қатар, Аламгир Смақов қатарынан үшінші ойында гол соғып жүр – алайда ол алаңда толық матч өткізбей-ақ көзге түсуде.

«Астананың» маңызды камбэгі

Өткен маусымда U-17 арасында күміс жүлдегер атанған, биыл басты турнирде ойнап жатқан елордалықтар жеңіс жолына қайта түскендей. «Каспийден» кейін Павлодарда «Ертіспен» өткен матч та сәтсіз басталған: 32-минутта пенальтиден Руслан Рахметов есеп ашты.

Алайда Ербол Мусабаевтың жасаған алмастырулары сәтті болып, алаңға екінші таймда шыққан Асланбек Марат пен Ермұхаммед Бесенғалиев шешуші голдарды соғып, «Астанаға» 2:1 есебімен жеңіс сыйлады.

«Ордабасы» алғаш рет жеңілді – оңтүстік дербиінде

Басты турнирде жеңіліссіз келе жатқан екі команда қалды – олар «Қайрат» пен өткен турда «Ақтөбені» жеңген «Жас Қыран». Ал «Ордабасы» бұл мәртебеден айырылды – олар «Таразға» қонаққа барып, 18-минутта Еркебұлан Науханбай соққан голға жауап қайтара алмады.

«Тараз» қазір сегізінші орында, бірақ екінші орында тұрған «Ертістен» небәрі төрт ұпайға ғана қалып келеді.

Олейник жарқ етті

«Қайраттан» ұтылғаннан кейін «Шахтер» толықтай қалпына келді – «Каспийге» еш мүмкіндік қалдырмай, Ақтауда 9:1 есебімен жеңіске жетті. Матчтың басты қаһарманы – 70 минутта үш гол соғып, бір нәтижелі пас берген Глеб Олейник. Бұл – маусымдағы екінші ғана ойыны. Бұған дейін ол «Тобылға» қарсы 90 минут ойнағанмен, нәтижелі әрекет жасамаған.

BS Arena-да тағы бір Глеб – Макридов та гол соқты. Қазір оның 4 голы бар – бұл көрсеткіш бойынша ол командаласы Нұрхан Қағазбаевпен, сондай-ақ «Ертіс» сапындағы Руслан Рахметов және «Атыраудан» Матвей Борисовпен тең. Тек «Қайрат» ойыншылары Абылай Төлеухан (8) мен Дәулет Орынбасар (5) ғана алда.

Сау бол, мектеп!

Өткен демалыста Freedom QJ League 218 ойыншысы мектеппен ресми түрде қоштасты. Көпшілігі соңғы қоңырауға сыныптастарымен бірге қатыса алмады – себебі олар бұл сәтте алаңда еді.

Бірақ бұл маңызды әрі әсерлі сәтті ойыншыларға сыйлау үшін Лига, өткен жылғыдай, символикалық рәсім ұйымдастырды: түлектер алаңға дәстүрлі ленталармен шықты.

Турдың ең нәтижелі матчтар

Freedom QJ League: «Каспий» – «Шахтер» (1:9)

Freedom QJ League U-17: «Қайрат» – «Тобыл» (8:0)

Freedom QJ League U-16: «Қайрат» – «Тобыл» (10:1)