Freedom QJ League-да өнер көрсеткен қай ойыншылар жаңа маусымға дайындалып жатыр: екінші бөлім

«Астана»

Елорда клубы алғашқы оқу-жаттығу жиынын өз стадионында өткізуде – бұл кезең 28 қаңтарға дейін жалғасады. Григорий Бабаянның жаттықтырушылар штабы негізгі құрам жаттығуларына Лигада өнер көрсеткен Мақсат Абраевты, Руслан Валиханды, Ахметали Қалтановты, Санжар Ануаровты, Тимур Төкеновті және Арсен Ахметовті қосты.

Бұл тізімдегі ең ересек ойыншылар – 2005 жылы туған Ануаров пен Төкенов. Ал ең жастары – 2008 жылғы жас санатынан шыққан, өткен маусымда флагмандық турнирге қатысқан Абраев пен Валихан.

Еске сала кетейік, Мақсат Абраев өткен маусым қорытындысы бойынша «Жыл перформансы» номинациясының жеңімпазы атанды. Ол турнирде жоғары нәтижелілік көрсетіп (18 матчта 9 гол + 7 ассист), сондай-ақ Freedom Media Cyber Cup чемпионы болды және QJL All Star матчында мадридтік «Атлетико» академиясының қақпасына гол соқты.

Қазіргі таңда «Астананың» негізгі құрамында ойнау тәжірибесі тек Санжар Ануаровта бар – ол 2024 жылы QFL Лига кубогы аясында дебют жасады. Қалған ойыншылар үшін бұл – елордалық клубтың негізгі командасындағы алғашқы матчқа жасалатын қадам.

«Шахтер»

Қарағандылық клуб негізгі құрамның оқу-жаттығу жиындарына бірқатар жас тәрбиеленушілерін қосты. Атап айтқанда, қақпашылар Никита Килджиев пен Нұрали Нұрғалиев, қорғаушылар Александр Мигунов пен Али Ақылбаев, жартылай қорғаушылар Нұрхан Қағазбаев, Глеб Макридов және Роман Асылбаев, сондай-ақ шабуылшы Илья Гезик.

Дмитрий Огайдың командасы алғашқы оқу-жаттығу жиынын Анталияда өткізіп жатыр және ол 22 қаңтарға дейін жалғасады.

Сонымен қатар «Шахтердің» қарамағында QJ League-да басқа командалар сапында ойнаған талантты жас футболшылар да бар. Бұлар – өткен жазда Қарағандыға ауысқан «Қайрат» тәрбиеленушілері Алихан Исраилов пен Артем Литош, сондай-ақ «Астана» футбол орталығының түлектері Даниял Назаров, Алан Азамат және Ален Пак.

Алдағы маусымда «кеншілер» Бірінші лигада өнер көрсетеді. Тимур Турловтың ұсынысымен жарыс регламентіне өзгерістер енгізілді: енді командалар алаңға міндетті түрде кемінде екі жас ойыншы шығаруы тиіс – олардың бірі 2007 жылы немесе одан кейін туған, ал екіншісі 2008 жылы немесе кейін дүниеге келген болуы керек.

Сондай-ақ еске саламыз, Глеб Макридов өткен маусым қорытындысы бойынша Changan MVP of the Season жүлдесінің иегері атанды. Бұл жеңіс оған беделді шетелдік клубта қаралымнан өтуге арналған грант алуға мүмкіндік берді. Аталған мүмкіндік Freedom QJ League мен Astana Motors құрамына кіретін Changan Kazakhstan ресми дистрибьюторы арасындағы серіктестіктің арқасында жүзеге асты.