Freedom QJ League-де өнер көрсеткен қай ойыншылар ҚПЛ-дың жаңа маусымына дайындалып жатыр: бірінші бөлім

«Қайсар»

Қызылордалықтар екінші оқу-жаттығу жиынын өткізіп жатыр — ол БАӘ-де өтуде. Лигада өнер көрсеткен ойыншылардан бас бапкер Андрей Ферапонтовтың тізіміне Темірлан Мұрзағалиев, Димаш Серікұлы, Дінмұхамед Рүстемұлы және Әлімжан Еркін енді. Соңғысы «Қайсар» сапына жақында ғана қосылды — бұған дейін ол бірнеше жыл «Екібастұзда» ойнаған.

Еркін бұған дейін ҚПЛ-де өнер көрсетіп көрмеген — алдағы маусым оның элиталық дивизиондағы дебюті болуы мүмкін.

«Ақтөбе»

«Қызыл-ақтар» Түркияда алғашқы оқу-жаттығу жиынын өткізіп жатыр — ол 29 қаңтарға дейін жалғасады. Бапкерлік штаб негізгі құрамға Freedom QJ League-де ойнаған қақпашылар Саятхан Құсайынов пен Парасат Қорғанбаевты, қорғаушылар Хасен Артурұлы мен Марк Богачевті, жартылай қорғаушылар Нұрдәулет Төреғали мен Аян Байдавлетовті, сондай-ақ шабуылшылар Мирам Кикбаев пен Виталий Латурнусты тартты.

Аталған ойыншылардың ішінде ҚПЛ-де ойнау тәжірибесі қазіргі таңда тек Байдавлетовта бар — 14 матч, алаңда 640 минут, бір гол және екі нәтижелі пас. Өткен маусымды «Ертіш» жүйесінде өткізген Кикбаев Павлодар командасының негізгі құрамында Қазақстан Кубогында ойнады, ал 2024 жылы «Ақтөбе» сапында Лига кубогында дебют жасады.

«Қайрат»

Алматылықтар Чемпиондар лигасының жалпы кезеңіндегі соңғы матчтарға — «Брюгге» мен «Арсеналға» қарсы кездесулерге белсенді дайындалып жатыр. «Қайраттың» қазіргі оқу-жаттығу жиыны Абу-Дабиде өтуде және 15 қаңтарға дейін жалғасады.

Freedom QJ League-де бұрын ойнаған футболшылардан Рафаэль Уразбахтиннің бапкерлік штабы Шерхан Қалмұрзаны, Данила Бучаны, Әмірбек Базарбаевты, Мұхамедәлі Әбішті, Исмаил Бекболатты, Рамазан Бағдатты және Мансұр Бірқұрмановты шақырды. Олардың ішінде негізгі құрамда ойнау тәжірибесі бар ойыншылар — Қалмұрза, Бағдат және Бекболат.

Айта кетейік, Дастан Сатпаев, Азамат Туяқбаев және Олжас Байбек жарақаттан кейінгі оңалту процесінен өтуіне байланысты жиынды өткізіп алуда.