Ягудина мен Дюсембаева жарқырауын жалғастыра ма, «Ертіс» таңғалтыра ала ма? Freedom QJ League W төртінші туры алдында нені білу керек

«Шахтер» – «Жетысу»

Бас бапкер Сергей Поленов атап өткендей, қарағандылық команда әр ойында алға қадам жасап келеді – Павлодардағы ірі жеңілістен кейін футболшы қыздар есін жиып, қатарынан екі жеңіспен турнирде сенімді жүріп келеді.

Қазіргі таңда «Шахтердің» жартылай қорғаушысы Саида Дюсембаева әр турда гол соғуда – ол бұл сериясын алдағы матчта жалғастыра ала ма? Ал «Жетысу» қалай өнер көрсетеді: талдықорғандық команда ойыншыларынан тосынсый күтуге бола ма?

«Ертіс» – «Астана»

Астаналық команда бұған дейінгі барлық кездесулерде жеңіске жеткенімен, ал павлодарлықтар ашылу матчындағы ірі жеңістен кейін екі рет жеңілгенімен, алдағы ойында бәрі бірдей айқын емес.

Мәселе мынада: үшінші турда «Астана» үш ойында бір ғана гол соққан және кестеде соңғы орындардың бірінде тұрған «Ақтөбені» әзер жеңіп шықты. Ал «Ертіс» өз кезегінде турнир фавориттері – «Ордабасы» мен «Қайратқа» есе жіберді. Дегенмен, павлодарлық команданың бапкері Ксения Постовая «сары-қараларға» қарсы кездесуден кейін өз шәкірттерінің ілгерілеуін атап өтті – оның айтуынша, қыздарға тәжірибе мен физикалық дайындық жетіспейді, бірақ бұл екеуі де уақытпен қалыптасады. Сондықтан бұл матч күтпеген нәтиже көрсетуі мүмкін – демек, қызықты өтеді деген сөз.

«Ордабасы» – «Қайрат»

«Қайрат» барлық алдыңғы матчтарында ірі есеппен жеңіске жетті, алайда Оксана Коханнаяның командасы бұл жолы оңай қарсыласқа тап болмайды – «Ордабасы» табанды ойын көрсететін ұжым болмақ. Шымкенттік команда «Ақтөбе» мен «Ертісті» бірде-бір гол жібермей ұтты және, сірә, өткен турда «Шахтерден» жеңілгеннен кейін тиісті қорытындылар жасаған сияқты. Енді Ербол Сарманның көшбасшыларға қарсы құрған жоспары қалай жұмыс істейтінін көреміз.

Ал «сары-қаралардың» жетістігі көбіне София Ягудинаның ойынына байланысты болмақ – үш тур қорытындысы бойынша оның еншісінде «гол+пас» жүйесімен 10 ұпай бар екенін еске сала кетейік.

«Ақтөбе» – «Тобыл»

Қазақстандық әйелдер футболының «Эль-Класикосы» аталып кеткен «Ақтөбе» мен «Тобыл» арасындағы матч қос команда үшін де оңайға соқпайды. Алдыңғы турда «Тобыл» «Жетісуды» ойсырата ұтып, көптен күткен үш ұпайға қол жеткізді. Енді болса, костанайлық футболшы қыздар талдықорғандық команданың қақпасына соққан сегіз жауапсыз голдың жай ғана сәттілік емес екенін дәлелдеуі керек.

Ал «Жетісу» секілді, «Ақтөбе» де әзірге ұпай жинай алған жоқ. Дегенмен, бұған дейін атап өткендей, өткен аптада Азамат Житписбаевтың командасы «Астанадан» тең есеппен кете жаздаған болатын – бұл, сөзсіз, мадаққа лайық нәтиже.