Әлем кубогы Алматыда: жас футболшылар аңызға айналған трофейді өз көздерімен көрді

Кубок Республика сарайында бар болғаны бірнеше сағатқа ғана қойылды. Бұл шара 2026 жылғы әлем чемпионаты қарсаңында ұйымдастырылып жатқан жаһандық тур аясында өтті. Турдың ұйымдастырушысы – ФИФА-ның көпжылдық серіктесі Coca-Cola компаниясы.

Аңызға айналған трофейді тірідей көру – әрбір футбол жанкүйерінің арманы, ал балалар үшін бұл әсердің маңызы тіптен ерекше. Осыған байланысты Freedom QJ League өкілдері іс-шара ұйымдастырушыларымен бірлесе отырып, алматылық «Қайрат» клубының жас тәрбиеленушілері үшін арнайы акция өткізді. Балаларға Кубокпен суретке түсу мүмкіндігі берілді. Осындай мүмкіндік ҚФФ академиясының тәрбиеленушілеріне де бұйырды.

Айта кетейік, шараның арнайы қонағы Италия құрамасы сапында 2006 жылғы әлем чемпионы атанған Марко Матерацци болды. Балалар миландық «Интердің» аңызға айналған қорғаушысымен жылы жүздесіп, естелікке қолтаңба алды.

«Әсер өте керемет. Әрине, мұндай іс-шаралар елімізде футболды дамыту үшін қажет. Әсіресе балалар үшін, оның ішінде кіші жастағыларға ерекше маңызды. Бұл оларға күш-қуат пен алдағы уақытта спортпен айналысуға мотивация береді. Лигаға шақырғаны үшін алғысымды білдіремін», – деді «Қайрат» академиясының жаттықтырушысы Константин Истомин.

«Маған Матерацци қолтаңба берді, онымен бірге суретке түстім. Ол – әлемдегі ең үздік ойыншылардың бірі, А сериясында және Чемпиондар лигасында жеңіске жеткен. Мені шақырғаны үшін QJ League-ға рахмет. Болашақта мен де әлем чемпионы болып, Қазақстанды алға шығарғым келеді», – деп әсерімен бөлісті алматылық клубтың жас тәрбиеленушісі Рамиз Баймуханов.

«ФИФА-ның серіктесі ретінде Coca-Cola әрбір мундиаль қарсаңында Әлем кубогының турын өткізуге эксклюзивті құқыққа ие. Бұл – біз ұйымдастырып отырған осындай алтыншы тур.

Алматы – Қазақстандағы ең ірі қала, әрі ауа райы жағдайлары іс-шараны ұйымдастыру кезінде ықтимал тәуекелдерден аулақ болуға мүмкіндік берді.

Бұл көрме балаларды болашақ жеңістерге шабыттандырады деп ойлаймын. Бүгін Марко Матерацци бала кезінде Әлем кубогын жеңуді армандағанын айтты. Ал 2006 жылы ол сол арманын жүзеге асырды. Демек, кез келген адамның арманы орындалуы мүмкін.

Freedom QJ League-ға командаларды біздің іс-шараға шақырғаны үшін алғысымызды білдіреміз. Балаларға өте қатты ұнады деп ойлаймын, олар ерекше шабыт алды», – деді Coca-Cola компаниясының Орталық Азия мен Кавказ елдеріндегі үкіметпен байланыс және коммуникациялар жөніндегі директоры Александра Аккирман.