Жарқынбек Жоламанов: «QJ League біз үшін сынақ әрі өсу мүмкіндігі болды»

«Қайсар» U18 командасы QJ League маусымын аяқтап, көптеген сынақтарға тап болғанымен, командалық рух пен дамуға деген ұмтылысын көрсетті. Команданың бас бапкері Жарқынбек Жоламанов сұхбатында маусым қорытындыларына деген өз көзқарасымен бөлісіп, жаңа ойыншыларды интеграциялау барысында кездескен қиындықтар, команданың әлсіз тұстары және оларды жою бойынша жоспарланған жұмыстар туралы айтты. Сондай-ақ, ол келесі маусымда жаңа биіктерге жету үшін көшбасшылықтың, заманауи технологиялар мен оқытудың маңыздылығын ерекше атап өтті.

 

– «Қайсар» командасының осы маусымдағы өнерін өткен маусыммен салыстырғанда қалай бағалайсыз?

– «Қайсар» U18 командасының өткен маусыммен салыстырғанда турнирлік кестедегі орны айтарлықтай өзгермеді. Бірақ жігіттердің көрсеткен қарым-қатынасы, QJ League-да жеке және командалық деңгейін жоғары бағалаймын. Себебі, былтыр біздің «Қайсар» U18 командасы Жасөспірімдер лигасында өнер көрсетті. Олар бірден QJ League-ға түсіп, жоғары деңгейдегі жарыстарға қатысып, мықты командалармен бәсекеге түсті. Бұл оңай болған жоқ, сондықтан турнирлік кестедегі орнымызға және ойындардың сапасына қанағаттанамын.

 

– Команданың құрамы елеулі өзгерістерге ұшырады. Жаңа ойыншыларды ойын жүйесіне интеграциялау қаншалықты қиын болды?

– Айтарлықтай өзгерістер болды. Биыл джокерлермен қиындықтар туындады деп айтуға болады. Біздің құрылымда бірнеше команда бар: Бірінші Лига, Екінші Лига, және QJ League. Ойыншыларды интеграциялау әсіресе маусымның ортасында қиындау болды. Сонымен қатар, командаға бірнеше жаңа ойыншы қосылды, олардың Лигадағы бұл бірінші маусымы. Бірақ осы қиыншылықтарды ұжым болып еңсере алдық. Көрсеткіштеріміз жаман болмады, жақсы ойын көрсеттік деп ойлаймын.

 

– Осы маусымда команданың ең әлсіз тұстары немесе осал аспектілері деп қай позицияларды немесе бағыттарды санайсыз?

– Қорғаныс шебі – бізде ең әлсіз позиция болды. Егер ойын аспектісін қарастырсақ, қорғаныстағы ойынды және стильді өзгерту арқылы жақсы нәтижелерге қол жеткізер едік.

 

– Қиын кезеңдерде командалық рухты сақтау үшін қалай жұмыс істейсіз?

– Бірінші жыл, биылғы маусым да біз үшін өте қиын болды. Бірақ ең бастысы – болашаққа үмітпен және сеніммен қарау. Жасап жатқан жұмысымыз міндетті түрде нәтижесін беруі керек. Біз жоспарға сәйкес жүйелі түрде жұмыс істейміз. Командалық рухты сақтау үшін бапкерлік штаб пен көшбасшы ойыншылардың қолдауына сүйенеміз.

 

– Команда ішінде алаңда немесе шешінетін бөлмеде сізге ұжым басқаруда көмектесетін көшбасшылар бар ма?

– Иә, бізде көшбасшы ретінде көрінетін джокерлер бар. Олар өткен маусымда QJ League-да ойнап, биыл Бірінші және Екінші Лигаларда тәжірибе жинақтаған жігіттер. Біз олардың көшбасшылық қасиеттеріне сенім артамыз.

 

– Келесі маусымдағы басты мақсаттарыңыз қандай? Оларды жүзеге асыру жоспарыңыз бар ма?

– Келесі маусымға үлкен сеніммен қараймыз. Қазір ауысу кезеңіндеміз. Жігіттерді іріктеп, QJ League-ның келесі маусымына мұқият дайындаламыз. Біздің басты мақсатымыз – тек турнирлік кестедегі орындарды жақсарту ғана емес, сонымен қатар ойыншылардың жеке дамуын қамтамасыз ету. Олар Екінші, Бірінші, Премьер Лига деңгейлерінде кәсіби тұрғыда өнер көрсетуі үшін дайындық жүргіземіз.

 

– QJ Лигасының жұлдыздар матчы аясында құраманың көмекші бапкері рөліндегі тәжірибеңіз кәсіби өсуіңізге қалай әсер етті?

– Бұл тәжірибе маған өте үлкен оң әсер етті. Жұлдыздар құрамасының бапкерлік штабында болу тек кәсіби деңгейімді арттырған жоқ, сонымен қатар жұмысқа деген қарым-қатынасымды, түсінігімді жаңа деңгейге көтерді. Себебі, ол жерде әртүрлі саланың кәсіби мамандары жиналды. Олардан алған тәжірибе кәсіби өсуіме зор ықпал етті.

 

– FF Manager платформасының қолайлылығы мен функционалдығы сіз үшін қаншалықты ыңғайлы болды? Платформаның қай функцияларын бапкерлік жұмыста ең пайдалы деп санайсыз?

– Әрине, бұл платформаны қолданамыз. Маусым ортасында жүзеге асырылған бұл платформа үшін QJ League ұжымына алғысымыз шексіз. Ол біздің жұмысымызды айтарлықтай жеңілдетті. Жоспар құру, конспект жазу, қажетті шаблондарды пайдалану сияқты көптеген мүмкіндіктер жұмысымызды жеңілдетіп, үлкен көмек көрсетіп жатыр.

 

– Лига ұйымдастырған онлайн және оффлайн семинарларға белсенді қатысасыз. Олардың сапасы мен практикалық пайдасын қалай бағалайсыз?

– Лига ұйымдастырып жатқан семинарларға тұрақты түрде қатысамын. Бұл семинарлардың пайдасы зор. Теориялық және практикалық сабақтарды жаттығу процесінде жиі қолданамыз. Одан алынған ақпараттар команданың дамуына оң әсер етуде. Семинарлар мен Zoom-конференциялардан үнемі қызықты әрі пайдалы мағлұматтар алып отырамыз.