4 ойында 31 гол: Freedom QJ League W-тің 8-турына шолу

«Ақтөбенің» сенімді сериясы жалғасуда

Турнирлік кестедегі көршілер – «Ақтөбе» мен «Ордабасы» арасындағы ойында батыс қазақстандық команда жеңіске жетіп, жеңісті сериясын төрт матчқа жеткізді. Алуа Қалиева, Айжан Есіркепова және Маулуда Арматтың голдары 77-минутта есепті ірі етті. 66-минутта Томирис Балниязова пенальтиді мүлт жібермегенде айырмашылық тіпті арта түсер еді. Шымкенттік команда тек 87-минутта Адрина Шуренова пенальтиден жауап қайырды.

«Ордабасы» құрамындағы негізгі қорғаушы Милана Алидзе қызыл қағаз алып, келесі ойынды өткізіп алады.

Талдықорғанда ірі есеп тіркелді

«Қайрат» «Жетісу» командасын сырт алаңда 11:1 есебімен ойсырата жеңді. Матчтың басты кейіпкері Милена Николенко болды – ол 6 гол соғып, 1 нәтижелі пас берді.

Сондай-ақ Розанна Талипова (хет-трик, 1 ассист), София Ягудина және Ясмина Тохниязова (екеуі де – 1+1) гол авторлары атанды. «Жетісудың» жалғыз голын Айнұр Ануарбек соқты.

Қайтарым болмады

«Шахтер» маусымның ашылу кездесуіндегі жеңіліс үшін «Ертіштен» есе қайтара алмады – бұл жолы өз алаңында 1:3 есебімен жеңілді.

51-минутта Әмина Аужанова есеп ашты. Алайда матч соңында Елизавета Медведева Айдана Байжановаға пас шығарып, артынан дубль жасап кетті.

Бұл – «Шахтердің» қатарынан төртінші жеңілісі. Ал «Ертіш» үшінші орнын сақтап қалды.

Қостанайдағы голдар фестивалі

«Тобол» мен «Астана» арасындағы кездесудің тағдыры бірінші таймда-ақ шешілді – үзіліске дейін қонақтар 4:0 есебімен алда болды. Екінші тайм басында артықшылық жеті голға жетті.

Софья Рыбак (3 гол, 2 ассист), Асыл Пазыл (1+2), Жібек Марат (2 гол), Зарэма Мақсұт (1+2) ерекшеленді.

73 пен 77-минут аралығында «Тобол» үш жауапты голмен қуантты – Диана Нұрқабаева және Алина Сартаева (дубль). Бірақ айырмашылық тым үлкен еді.

89-минутта Софья Рыбактың бұрыштамасынан кейін Альзия Жамбыл есепті 8:3-ке жеткізді.