Жойқын тең ойын және шиеленісті финал: QJL All Star – «Атлетико» матчы өтті!

Лиганың флагмандық турниріндегі үздік ойыншылар құрамасы Еуропаның басты грандтарының бірі – мадридтік «Атлетико» академиясының тәрбиеленушілеріне қарсы шықты.

Freedom Ticketon арқылы сатылған билеттердің барлығы өтіп кетті – трибунада 3 115 жанкүйер жиналды.

Стадион есігі алматылықтар мен қала қонақтарына 18:30-да ашылды. Кештің концепциясы неон жарығы мен жаңа технологиялар эстетикасына негізделді. Бұл тақырып барлық фестиваль элементтерінде көрініс тапты: аймақтарды безендіруден бастап, матч алдындағы интерактивтер мен шоуларға дейін.

Ойын басталар алдында көрермендер Лиганың өткен Жұлдыздар матчтарына арналған әсерлі лазерлік шоуды тамашалады. Сол кезде қарсылас ретінде Super bol жобасының командасы мен «Црвена Звезда» академиясы шыққан еді. Еске сала кетейік, QJL All Star екі ойында да жеңіске жеткен болатын – 6:1 және 2:0 есебімен.

Одан кейін жанкүйерлерге және қонақтарға сөз арнағандар: ҚФФ президенті Марат Омаров, Қазақстандағы Испания елшісі Франсиско Мартинес Монтес, Freedom QJ League қамқоршылық кеңесінің төрағасы Тимур Турлов, «Атлетико Мадрид» академиясының Қазақстандағы жетекшісі Шалқар Нүртлеу, сондай-ақ Лига президенті Рохус Шох.

Испания және Қазақстан гимндері орындалып, төрешінің ысқырығы ойынды бастап берді. Алғашқы минуттардан-ақ бастаманы қолға алған испандықтар 9-шы минутта есеп ашты – голдың авторы Гонсало Гросс. Бірінші таймда басқа голдар болған жоқ.

Үзіліс кезінде көрермендер тағы бір лазерлік перформансты тамашалады – бұл жолы би тобының қатысуымен өтті.

Екінші таймда QJL All Star құрамасы есепті теңестіре алды – 58-ші минутта қарсыластың қақпасын Максат Абраев дәл көздеді. Матч тағдырын пенальти сериясы шешті – онда испан қонақтары сәттірек болды.

Ойынның үздік ойыншыларына берілетін Changan MVP of the Match жүлдесін QJL All Star қақпашысы, павлодарлық «Ертіс» ойыншысы Мадияр Төлеубек, сондай-ақ «Атлетико» жартылай қорғаушысы Альваро Тамарго Гомес иеленді.

Матчтан кейін дәстүрлі afterparty өтті, оның хедлайнерлері – Орталық Азия чемпионы DJ PUZA және Freaky Monday негізін қалаушы DJ BURLYAEV болды.

Іс-шара Лига серіктестерінің қолдауымен ұйымдастырылды: Freedom Holding Corp., Mastercard, Changan, Astana Motors және Citix.