QJL All Star: «Атлетико» ойыншыларымен жақынырақ танысу

Диего Пикерас – командадағы қос қақпашының бірі әрі ең жас ойыншылардың бірі. Қыркүйек айының басында ол небәрі 16 жасқа толады. Ол «Валенсияның» тәрбиеленушісі, ал мадридтік клубқа дарынды жас ойыншы биыл ғана қосылды. Пикерас Испания U16 құрамасында екі ойын өткізді: Италиямен кездесуде (3:2) екі гол жіберсе, Түркиямен матчта (3:0) қақпасын «құрғақ» сақтады.

Адриан Мартинес Васкес – 17 жастағы қорғаушы, «Атлетиконың» түлегі. Ол Испанияның U15 және U16 құрамаларына шақырылған. Дәл сондай жолдан өткен ойыншылардың бірі – 16 жастағы жартылай қорғаушы Иан Хонатан Менсия Ларрамендия.

Команданың орталық қорғаушысы Оскар Торрельяс Дуран да назар аударарлық. 18 жастағы бұл футболшы қорғаныс шебін басқарып, дәл әрі өткір бірінші пасымен ерекшеленеді. Жас болса да, ол әйгілі Roc Nation Sports агенттігінің клиенті – дәл осы компания Кевин де Брюйне мен Винисиус Жуниордың да істерін жүргізеді. Оскар – «Корнельяның» түлегі, 2023 жылы «Атлетикоға» ауысқан. Өткен маусымда ол Юношеская лигада ойнап, команда 1/8 финалда «Ред Булл Зальцбургке» жол берген еді.

Хавьер Тена Ваньо – 17 жастағы тірек жартылай қорғаушы. Ол биыл жазда «Валенсиядан» 80 мың еуро және бонус үшін «Атлетикоға» ауысқан. Ойын интеллекті жоғары, әуедегі дуэльдерде мықты және шабуылды көзді тапқан паспен бастайды. Оның да Испания U16 құрамасында ойнаған тәжірибесі бар.

Даниэль Фицджеральд – 17 жастағы ағылшын футболшысы, Испанияда туып-өскен. Ол «Эльче» жүйесінен «Атлетикоға» бас бапкерімен бірге келген. Клуб оған 150 мың еуро төлеген. Өткен маусымда Фицджеральд «Эльченің» екінші командасында дебют жасап, бірден гол соққан. Ол сол жақ инсайд не орталық шабуылшы позицияларында ойнай алады. Ерекшелігі – допты аяқтың сыртымен стандарттан тыс соғуы және алыс қашықтықтан қауіпті соққыларымен танылуы.

Рубен Гомес Эрнандес – 15 жастағы вундеркинд, жазғы маусым алдындағы дайындықты «Атлетиконың» негізгі құрамымен өткізді. Ол Испанияның U15 және U16 құрамаларында да ойнаған.

Команданың капитаны – Оскар Базага Касас. Ол Испанияның үш бірдей жас құрамасында – U15, U16 және U17 – өнер көрсеткен. Ертең ол 18 жасқа толады. Жас болса да, оған «Севилья» мен дортмундтық «Боруссия» назар аударған. Мадридте туған Оскар алғашқы қадамын «Райо Вальеканода» жасап, 2020 жылдан бері «Атлетикода». Ол негізгі құраммен бірге жаттыққан тәжірибесі бар. Бұрын орталық шабуылшы болғанымен, қазір бапкерлер оны оң қапталдағы вингер позициясында сынап жүр. Бойы аса биік емес (180 см), бірақ допты корпусымен жақсы қорғап, күреске белсенді араласады. Қазақстан – оның алғашқы сапары емес: «Атлетико» сапында ол бұған дейін Мексика мен АҚШ-та турне өткізген.

Бұл – Алматыға келген мадридтік футболшылардың толық тізімі емес. Құрамда жоғары деңгейлі жас ойыншылар бар, әрі дәл осы кеште олар «Хан-Тенгри» стадионында алаңға шығады.

QJL All Star матчы 20:00-де басталады, жанкүйерлерді матч алдындағы белсенділіктер 18:30-дан күтіп тұрады. Тікелей эфир Freedom Media-да қолжетімді болады.