«Ақылды» камералар енді жаттығуларда да! Бұл Лига командаларына қалай көмектеседі?

«Ақылды» Pixellot камералары BigBro-мен бірлескен жоба аясында биыл А лигасының барлық стадионына орнатылды. Олар матчтарды ғана емес, жаттығу сабақтарын да егжей-тегжейлі талдауға мүмкіндік береді.

Ыңғайлы интерфейс және жедел есептер

Жаттығуды Pixellot камерасына жазу матчты түсіру қағидаты бойынша жүзеге асырылады. Бапкер FF Manager күнтізбесінде жаттығуды бірнеше рет басу арқылы жоспарлай алады, ал жабдық қажетті уақытта автоматты түрде қосылып, өшеді – платформа құрылғыға барлық қажетті ақпаратты өзі жібереді.

Камера панорамалық форматта бүкіл алаңды толық түсіреді. Соның арқасында алаңның әртүрлі бөлігінде жаттығуға қатысып жатқан барлық ойыншының әрекеті көрінеді.

Нәтиже нақты уақыт режимінде BigBro сервисіне түседі. Онда бейнежазба жасанды интеллект жүйесі арқылы талданады – жүйе манишкадағы нөмірді автоматты түрде таниды, ойыншыны бүкіл жаттығу бойы «бақылап», оның техникалық-тактикалық әрекеттері мен фитнес көрсеткіштерін есептейді. Келесі күні-ақ команда бапкері сервистен толық есеп алады. Талдау шығындарын Лига толығымен өтейді.

Жаттығуларды талдау – спорттық-сараптамалық бөлімнің негізгі жобалары саналатын «Болашақ ойыншысы» және «Болашақ бапкері» бағдарламаларының маңызды бөлігі. Оларға қатысатын мамандар өз жұмысында цифрлық құралдарды пайдаланудың жаңа мүмкіндіктеріне ие болады.

Ең талантты футболшыларды дамытуға бағытталған қосымша жаттығуларды ұсақ-түйегіне дейін талдауға болады. Бұл бапкерге бейнежазба мен аналитикалық деректерді пайдалана отырып, ойыншыға белгілі бір техникалық және тактикалық ерекшеліктерді нақты мысалдар арқылы түсіндіруге мүмкіндік береді.

Кез келген сценарийге арналған түстер

Жаттығу барысында ойыншылардың мықты қырларын жеке-жеке талдауға мүмкіндік жасау үшін Лига манишкалардың дизайнына бір қарағанда елеусіз, бірақ маңызды өзгеріс енгізді – оларға нөмірлер жазылды.

Манишкалар екіжақты болып келеді және 30 нөмірленген данадан тұратын екі жиынтық түрінде беріледі – осылайша әр футболшыға төрт түрлі түстегі жеке манишка бекітіледі. Мұндай әртүрлілік жаттығу барысында кез келген ойын сценарийін модельдеуге мүмкіндік береді.

Мысалы, допқа иелік етуді жетілдіру әдістемесі жаттығуда бейтарап ойыншыларды пайдалануға негізделеді. Олар әрдайым допқа иелік етіп тұрған тараптың сапында ойнап, сандық басымдық қалыптастырады.

Бірден үш тарап қатысатын жаттығулардың да бірнеше түрі бар:
– екі команда бір командаға қарсы доп ұстайды, ал доптан айырылған тарап бірден оны тартып алуға кіріседі;
– үш құрам белгіленген уақыт аралықтарынан кейін кезекпен ауысады;
– «жеңімпаз қалады» қағидаты бойынша гол жіберген топ алаңнан шығып, келесі топ қақпаны қорғауға бірден кіріседі.

Осылайша бір жаттығу барысында футболшы манишкасының түсін бірнеше рет ауыстыруы мүмкін.

«Ең бастысы – футболшыға түсін ауыстырған кезде өз нөмірі жазылған манишканы киюі керектігін түсіндіру. Ақ түсті манишкада 15-нөмірмен ойнады ма, сары түсті манишка алғанда да қайтадан 15-нөмірді киеді. Сонда камера дәл сол ойыншының әрекеттерін есептеуді жалғастыра береді. Кейін бұл талдау кезінде көп уақыт үнемдейді.

Біз мұны QJL All Star-ға дайындық кезінде сынап көрдік. Ол кезде барлық жаттығу Pixellot камерасына түсіріліп, BigBro сервисінде талданды. Әр жаттығу манишкаларды ауыстыру барынша жылдам өтетіндей етіп алдын ала жоспарланды», – дейді ССБ жетекшісі Бауыржан Сағындық.

Ұзақмерзімді даму

«Pixellot камерасының тек QJ League-де өнер көрсетіп жүрген командаларға ғана қолжетімді еместігі маңызды», – деп жалғастырды Бауыржан Сағындық. «Лига жабдықты тек нысаналы жас санаттарымен шектемейді. Керісінше, оны болашақта Лигада өнер көрсетуге дайындалып жүрген футбол орталықтарының командалары мен бапкерлеріне де меңгеруді ұсынамыз. Бұл нөмірленген манишкаларға да қатысты. Астана, Шахтер, Ертіс және Жас Қыран секілді көптеген клуб бұл мүмкіндікті белсенді пайдаланып, цифрлық жүйені барлық жас санатындағы командаларына енгізді».

Лиганың Қазақстандағы жетекші футбол орталықтарына арнап енгізген құралдары 12 жасқа дейінгі балаларды даярлауға басымдық беретін ірі қазақстандық жекеменшік футбол мектептерінің де, шетелдік академиялардың да ерекше қызығушылығын тудырды. Қазіргі уақытта QJ League әртүрлі мектептермен және клубтармен FF Manager цифрлық сервисі мен оған байланысты инновацияларға қолжетімділік беруге мүмкіндік жасайтын ықтимал ынтымақтастық форматтары жөнінде келіссөздер жүргізіп жатыр.