Қыздар турнирінің кезекті турына шолу.
«Астана» – «Шахтер»
Өткен турда алаң иелері Ақтөбеден үш ұпай алып қайтып, жеңіліссіз сериясын жалғастырды және бірінші орнын сақтап қалды.
«Шахтер» бұл матчқа мүлде басқа көңіл күйде келеді. «Күлбикештер» қатарынан екі турда жеңіліп, «Қайратпен» кездесу 0:11 есебіндегі ірі жеңіліспен аяқталды. Соның салдарынан сегіз ұпай жинаған команданың доп айырмасы -7 болып, турнир кестесінде бесінші орынға түсті.
Сегіз ұпай – үшінші және төртінші орындарда келе жатқан «Ақтөбе» мен «Тобылда» да бар. Кестенің орта тұсындағы тығыздық соншалық, сәтті жағдай қалыптасса, «Астананы» жеңу «Шахтерді» үздік үштікке көтеруі мүмкін.
Қарағандылық команданың басты үміті – бес матчта төрт гол соққан Мария Мамонтова. Бұл – команданың барлық голының үштен бірі.
Алаң иелерінің шабуыл шебі өте қауіпті әрі сан қырлы. Асыл Пазыл бес турда бес гол соқты, ал Жібек Марат «гол+пас» жүйесі бойынша 4+5 көрсеткішін жинады. Ол нәтижелі пастар саны бойынша «Қайрат» ойыншысы София Ягудинамен бірге Лигада көш бастап тұр.
«Тобыл» – «Ақтөбе»
Үшінші орын үшін тікелей тартыс. Екі командада да сегіз ұпайдан және бірдей көрсеткіш бар: екі жеңіс, екі тең ойын және екі жеңіліс. Оларды тек доп айырмасы бөліп тұр: «Ақтөбеде» +1, ал «Тобылда» -3.
«Тобыл» әзірге өз алаңында небәрі екі матч өткізіп, екеуінде де жеңіске жетті: «Ертісті» 3:2, «Қайсарды» 5:0 есебімен ұтты. Ал сырт алаңда команда әлі бірде-бір рет жеңген жоқ: екі тең ойын және екі жеңіліс.
«Ақтөбеде» жағдай керісінше – бұл команданың сырт алаңдағы үшінші ғана матчы болмақ. Оның үстіне, «қызыл-ақтар» өз қаласынан тыс жерде ұпай жоғалтып үлгерді: Шымкенттегі кездесу 1:1 есебімен аяқталды. Бір қызығы, Аслан Бөкенбайдың командасы «Қайсарды» 5:0 есебімен ойсырата жеңіп, «Шахтерден» 4:2 есебімен басым түсті, бірақ қазір турнир кестесінің төменгі бөлігінде тұрған «Ертіспен» де (0:0), «Ордабасымен» де үш ұпай ала алмады.
«Тобылдың» шабуылдағы статистикасы біркелкі көрінеді: Алина Сартаева мен Амура Карабаева үш голдан, Варвара Цой мен Ясмина Мантулина екі голдан соқты. Ал «Ақтөбе» сапында Айжан Есіркепова төрт, Әлия Самат үш голмен ерекшеленіп жүр.
«Қайрат» – «Қайсар»
«Сары-қаралар» алты ойында 31 гол соқты. Өткен турда «Шахтерді» сырт алаңда 11:0 есебімен жеңуі маусымдағы ең ірі нәтиже болды.
«Сары-қаралардың» әзірге жалғыз сүрінген тұсы – «Астанадан» 0:2 есебімен жеңілуі. «Қайратты» бірінші орыннан бөліп тұрған да осы нәтиже, алайда айырма ең аз деңгейде.
«Қайсар» өте ауыр кезеңді бастан өткеріп жатыр: екінші турдағы жеңістен кейін қатарынан төрт рет жеңілді. Өткен турда қызылордалықтар өз алаңында «Ертіске» 0:1 есебімен жол беріп, үш ұпай және -19 доп айырмасымен соңғы орында қалды.
«Қайрат» шабуылшысы Милена Николенко жеті голмен мергендер жарысында сенімді түрде көш бастап келеді. Ол қатарынан екінші «алтын бутса» үшін күрестегі орнын нығайта ала ма?
«Ертіс» – «Ордабасы»
Турнир кестесіндегі тағы екі көрші кездеседі: екі командада да төрт ұпайдан бар.
«Ертіс» өткен турда «Қайсарды» минималды есеппен жеңіп, маусымдағы алғашқы жеңісіне қол жеткізді. Ал «Ордабасы» – турнирде әлі бірде-бір матчта жеңіске жетпеген жалғыз команда.
Есесіне, Шымкент өкілдері тең ойындар саны бойынша көш бастап тұр: қатарынан төрт матч, әрі бұл серия әлі жалғасып келеді. Еске салайық, дәл «Ордабасы» елордада «Астанадан» ұпай алған еді – 2:2.
Оңтүстік командасының шабуылшысы Диана Ситникова да ерекше назарға лайық. Ол бес матчта небәрі бір гол соққанымен, қақпаға 42 соққы бағыттады – бұл турнирдегі ең жоғары көрсеткіш. Оның орташа xG көрсеткіші 4.28-ді құрайды – Милена Николенкодан кейінгі екінші нәтиже. Диана көздеген нысанасына дәл тиетін күнге жете ала ма?
.png)
.png)
