Алматы дербиі және қола жүлдеге үміткерлердің текетіресі: Freedom QJ League 20-турының аңдатпасы

ҚФФ Академиясы – «Астана»

ҚФФ Академиясы 23 ұпаймен жетінші орында келеді және жүлделі орындарға таласу мүмкіндігінен айырылды. Соңғы бес матчтың төртеуінде жеңілген Лиганың ең жас командасы үш кездесуде бірдей 1:2 есебімен ұтылды. Өткен турда капитан Давид Заречный (гол+пас жүйесі бойынша 2+3) алаңнан қуылды, сондықтан ол «Астанаға» қарсы матчқа қатыса алмайды.

«Астана» (16 ұпай, оныншы орын) қатарынан он тур бойы жеңіске жете алмай келеді: үш тең ойын және жеті жеңіліс. Елорда командасы соңғы рет 9-турда жеңіске жеткен болатын. Бір қызығы, сол кезде дәл ҚФФ Академиясын 4:0 есебімен ұтқан. Ол матчта Арсен Испанов дубль авторы атанды. Қазір де ол бес голмен команданың үздік сұрмергені болып отыр. Ал қақпашы Тамерлан Жанабергенов екі пенальтиді қайтарған еді.

«Астана» осы маусымда сырт алаңда небәрі екі рет жеңіске жетті. Елорда командасының шабуыл ұйымдастырудағы басты ойыншысы – Амандық Хамидуллин. Оның еншісінде жеті нәтижелі пас бар. Турнирде бұл көрсеткіш бойынша тек Аян Аманжұлов пен Алихан Рамазанов қана алда. Елорда командасы жеңіссіз сериясын тоқтата ала ма, әлде алаң иелері бірінші айналымдағы жеңілістің есесін қайтара ма?

«Қайсар» – «Ертіс»

«Қайсар» 18 ұпаймен тоғызыншы, ал «Ертіс» 15 ұпаймен он бірінші орында тұр. Павлодарлықтар турнир кестесінің соңында келе жатқан «Каспийден» небәрі бір ұпай алда.

Өткен турда «қасқырлар» Тараздан үш ұпай алып қайтты (1:0), ал павлодарлықтар өз алаңында ҚФФ Академиясын жеңді (2:1). Екі команда да 56 голдан жіберген – бұл турнирдегі ең нашар көрсеткіш.

Қонақтардың сырт алаңдағы статистикасы көңіл көншітпейді: тоғыз матчта сегіз жеңіліс, ал жалғыз жеңісі – Астанадағы 3:2 есебімен аяқталған кездесу. Дегенмен «Қайсардың» да құрамы әлсіреген: қорғаушы Жалғас Сайлаубек пен шабуылшы Бекжан Жеңісбек алдағы матчты өткізіп алады.

Алаң иелері сапында Ернар Парда (гол+пас бойынша 7+4) мен Мәди Жеңісұлы (7+1) ерекшеленеді. Ал «Ертісте» Мадияр Есен (6+4) мен қақпашы Арсений Катьетов көзге түсіп жүр. Катьетовтің еншісінде 88 сейв бар – бұл «Тобыл» қақпашысы Даниил Нұржановпен бірге турнирдегі ең үздік көрсеткіш.

Бірінші айналымдағы кездесу 1:1 есебімен аяқталған еді. Бұл жолы нәтиже қандай болмақ?

«Каспий» – «Шахтёр»

«Шахтёр» екінші орынды мерзімінен бұрын қамтамасыз етті: қарағандылықтар «Ордабасыдан» 11 ұпай алда, ал қалған үш турда ең көбі тоғыз ұпай жинауға болады. Бұл – қарағандылықтардың Лиганың басты турниріндегі алғашқы күміс жүлдесі. 2023 және 2024 жылдары олар төртінші орын алса, өткен маусымда үшінші сатыға жайғасқан еді.

Команда қатарынан тоғыз тур бойы жеңілген жоқ және алдағы матчқа үш жеңістен тұратын сериямен келеді. Соңғы кездесуде «Шахтёр» «Ордабасыны» 3:1 есебімен ұтты.

Алайда қарағандылықтар Ақтауға сол матчта алаңнан қуылған қорғаушы Мейірлан Балтабаевсыз және дисквалификациясының тағы бір матчтық мерзімі қалған жартылай қорғаушы Данил Литвиненкосыз аттанады. Айта кетейік, «Шахтёр» осы маусымда ұпай жоғалтқан барлық кездесулерін сырт алаңда өткізген.

Ал «Каспий» 14 ұпаймен турнир кестесінің соңында тұр және қатарынан төрт тур бойы жеңіске жете алмай келеді. Өткен матчта ақтаулықтар «Қайраттан» 0:4 есебімен жеңіліп, қызыл қағаз алған қорғаушы Аян Құлжарастан айырылды. Алаң иелері қарағандылықтардан бірінші айналымдағы 1:4 есебімен аяқталған матчтың есесін қайтарып, соңғы орыннан көтеріле ала ма?

«Ордабасы» – «Тараз»

Жексенбілік матчтар бір уақытта басталады. «Ордабасы» 33 ұпаймен үшінші орында келеді және «Тобылдан» төрт ұпай алда. Шымкенттіктер осы турдың өзінде қола жүлдені қамтамасыз ете алады. Ол үшін алдымен «Таразды» жеңуі қажет.

Алайда алаң иелері тұрақтылығымен мақтана алмайды: соңғы үш турда бір жеңіс, бір тең ойын және бір жеңіліс тіркелді. Есесіне «Қайратпен» болған 1:1 есебіндегі тең ойын «Ордабасыны» чемпионнан ұпай алған әзірге жалғыз командаға айналдырды. Оның үстіне шымкенттіктер өз алаңында тек бір рет – ҚФФ Академиясынан 3:4 есебімен жеңілген.

«Тараз» (19 ұпай, сегізінші орын) қатарынан үш матчта жеңіліс тапты. Ал сырт алаңдағы жалғыз жеңісіне Павлодарда қол жеткізді – 1:0. Қонақтардың шабуылдағы басты үміті – тоғыз гол соғып, үш нәтижелі пас берген Расул Нұрманбай.

Бірінші айналымда «Ордабасы» Таразда 3:2 есебімен басым түскен еді. Ол кезде шымкенттіктер 35-минутқа қарай үш доп айырмасымен алда тұрған. Самат Наурызбаевтың командасы бұл жолы алғашқы минуттардан бастап лайықты қарсылық көрсете ала ма?

«Жас Қыран» – «Қайрат»

Алматы дербиі «Қайраттың» чемпион мәртебесіндегі алғашқы матчы болмақ. «Сары-қаралар» «Каспийді» 4:0 есебімен ойсырата жеңіп, маусымның аяқталуына үш тур қалғанда чемпиондық атақты қамтамасыз етті. Бұл – команданың қатарынан төртінші чемпиондығы.

«Жас Қыран» 27 ұпаймен алтыншы орында тұр және алты тур бойы жеңілген жоқ. Дегенмен соңғы үш кездесуі тең аяқталды. Егер алаң иелері жексенбіде «Ордабасыдан» аз ұпай жинаса, үшінші орынға таласу мүмкіндігінен біржола айырылады.

Бірінші айналымда «Қайрат» 4:1 есебімен жеңіске жетті. Ал бір жыл бұрын «Жас Қыран» чемпион екі кездесуде де жеңе алмаған жалғыз қарсылас болған еді (0:0 және 2:2). Алматыдағы текетірес бұл жолы да тосынсый сыйлай ма?

«Тобыл» – «Ақтөбе»

Қостанайда қазақстандық футболдағы басты қарсыластықтардың бірінің жасөспірімдер арасындағы нұсқасы өтеді. Сонымен қатар бұл – қола жүлдеге үміткер екі команданың тікелей текетіресі.

«Тобыл» 29 ұпаймен төртінші орында келеді және соңғы үш матчтың бәрінде жеңіске жетті. «Ақтөбе» екі ұпайға артта қалып отыр және төрт тур бойы жеңілген жоқ. Оның үстіне «қызыл-ақтар» осы кездесулердің екеуінде алты голдан соқты.

Қостанайлықтар турнирдегі ең аз гол соққан команда (22 доп) болғанымен, қорғаныс көрсеткіші бойынша үшінші орында (21 жіберілген гол). Негізгі тұлға – қақпашы Даниил Нұржанов. Оның еншісінде 88 сейв бар, ал соққыларды қайтару көрсеткіші 81%-ға жетеді. Бұл – кемінде он матч өткізген қақпашылар арасындағы ең жоғары пайыз. Fantasy QJ League құрамын таңдағанда осыны ескерген жөн.

Ал «қызыл-ақтар» 41 гол соғып, 42 доп жіберген. Шабуылды ұйымдастырудағы көшбасшылар – Аян Аманжұлов (9+9, турнирдің үздік ассистенті) мен Ибраһим Бауыржанов (7+7).

Бірінші айналымдағы кездесуде «Ақтөбе» өз алаңында 2:0 есебімен жеңген болатын. Осы демалыста қай команда жүлделі орынға қарай маңызды қадам жасайды?