Жасанды интеллект Freedom QJ League қызметінде: Тихон Фисейскиймен сұхбат

Лига бұл жобаны Freedom экожүйесінің тағы бір мүшесі – Freedom Telecom компаниясымен бірлесіп жүзеге асыруды жоспарлап отыр. Телекоммуникациялық оператор, басқа да қызметтермен қатар, QJ League-ның бірқатар командалары жаттығатын және матчтарын өткізетін спорттық нысандарды осы жабдықты пайдалану үшін қажет жоғары жылдамдықты кең жолақты Интернетке қолжетімділікті қамтамасыз ететін жеке арналармен жабдықтайды.

Пилоттық жоба 2025 жылы 4 қалада іске қосылуы жоспарланып отыр, ал болашақта оны басқа өңірлерге кеңейту көзделуде. Жиналған деректер 2024 жылы Лига әзірлеп, іске қосқан FF Manager жаттығу процесін цифрландыру платформасымен біріктірілетін болады.

BigBro жобасының негізін қалаушы және жетекшісі Тихон Фисейский, Лига ынтымақтастық туралы келіссөздер жүргізіп жатқан маман, жоспарланған өзара іс-қимылдың егжей-тегжейлерімен бөлісті.

– Біз Computer Vision технологиясы негізінде ойын және жаттығу процестерін терең талдаумен айналысамыз. Арнайы камералар арқылы жаттығулар мен ойындарды түсіреміз, содан кейін оларды біздің жасанды интеллект жүйеміз арқылы өңдейміз, терең деректерді жинаймыз – және әрбір ойыншының барлық белсенді әрекеттерін қамтитын қысқа хайлайттар мен үзінділер жасаймыз.

– Осы камералар туралы толығырақ айтып бере аласыз ба?

– Бұл спортқа арналған арнайы жасанды интеллект (ЖИ) камералары, олар бүкіл алаңды түсіруге мүмкіндік береді. Бұл барлық ойыншыларды ойын барысында көруге, доптардың қозғалысын бақылауға, олардың орналасуын тіркеуге және сәйкесінше барлық тактикалық әрекеттер мен ойыншылардың фитнес деректерін есептеуге мүмкіндік береді.

Идея мынада: «компьютерлік көру» деп аталатын технология объектіні – ойыншыны немесе допты – анықтап, оның алаңдағы координаттарын белгілейді. Одан кейін, ол жүгіріп, орын ауыстырғанда, оның «ізі» 2D жазықтығында қалыптасады. Осылайша, оның барлық параметрлерін есептеуге болады. GPS-трекерлер де, сенсорлар да қажет емес: тек бейне арқылы біз ойыншының үдеуін, жылдамдығын, жүгірген қашықтығын және басқа да көрсеткіштерін анықтай аламыз. Сол сияқты, технико-тактикалық әрекеттерді де талдауға болады: пастардың дәлдігі, соққылар, дриблинг, жеңген жекпе-жектер – барлық терең талдау мүмкіндіктері қолжетімді.

– Бұл технологияны енгізу қалай жүзеге асатынын айтып бере аласыз ба?

– Қазіргі уақытта біз Freedom QJ League және Freedom Telecom байланыс операторы арасында ірі келісімшарт жасау үдерісіндеміз. Бұл өте қызықты жоба, әрі ол Freedom жүзеге асырып жатқан түрлі салаларды цифрландыру бойынша ауқымды жұмысқа тамаша үйлеседі. Лиганың спорттық-аналитикалық бөлімі бұрын QJL жасағандай тек матчтарды ғана емес, ең алдымен жаттығу процесін талдауды мақсат етеді. Бұл түсірілген бейнежазба мен жиналған статистика негізінде жаттықтырушыларға ұсыныстар беруге, сондай-ақ мамандар мен футболшылардың біліктілігін одан әрі дамытуға мүмкіндік береді.

Екі санаттағы камера қарастырылған: тұрақты және портативті. Тұрақты камералар төрт стадионда орнатылып, тәулік бойы жұмыс істейтін болады. Ал портативті камералар жобаның аясында да беріледі. Спорттық-аналитикалық бөлім оларды ойыннан ойынға тасымалдап, қажет жерде қолдана алады.

– Сіздің компанияңыз қазір қай футбол лигаларымен ынтымақтастық орнатып жатыр?

– Біздің клиенттеріміз әлемнің түрлі елдерінде бар. Мысалы, Грузиядағы серіктес компаниямыз жергілікті жасөспірімдер футболына деректер ұсынады, клубтарға, ойыншыларға және олардың ата-аналарына матч жазбалары мен аналитикалық есептерді береді. Сонымен қатар, біздің клиенттеріміз Еуропаның басқа елдерінде, БАӘ-де және АҚШ-да да бар.

Қазақстан және Freedom QJ League – біз үшін өте маңызды жоба, өйткені мұнда спорттық аналитика мен футболдың медиа құрамына үлкен мән берілетінін байқап отырмыз.

Бұл ынтымақтастық аясында біз ойыншылардың матчтардағы және жаттығулардағы маңызды сәттерін (хайлайттарын) ұсынамыз. Бұл тек футболшылардың өздері, олардың ата-аналары, Лига мен клуб өкілдері үшін ғана емес, көрермендер үшін де қызықты болады деп ойлаймын.