Қазақстан Суперкубогы: QJ League ойыншыларының қайсысы алаңға шыға алады?

Екі команда да маусым алдындағы жиынды Түркияда өткізді, және олардың құрамында өткен немесе алдыңғы маусымды QJ League-да өткізген ойыншылар болды.

«Қайраттың» жиынына QJ League ойыншыларының арасынан қақпашы Шерхан Қалмұрза, қорғаушы Данияр Ташпұлатов, жартылай қорғаушылар Олжас Байбек пен Әбілқайыр Абдрахманов, сондай-ақ шабуылшылар Исмаил Бекболат, Рамазан Бағдат және Дастан Сәтпаев қатысты.

Ал «Ақтөбенің» құрамында Түркияға қақпашы Саятхан Құсайынов, жартылай қорғаушылар Аян Байдәулетов, Мирас Уманиязов және шабуылшы Мирам Кикбаев аттанды.

Бұл жігіттердің арасынан өз клубтарының негізгі командаларында ресми матчтарға қатысқан ойыншылар бар: олар – «Қайраттың» ойыншылары Олжас Байбек пен Дастан Сәтпаев, сондай-ақ «Ақтөбеден» Аян Байдәулетов, Мирас Уманиязов және Мирам Кикбаев. Ал қалғандары ересектер футболындағы алғашқы қадамдарын енді жасамақ.

QJ League-да жарқыраған жігіттердің кейбірі Суперкубокта да алаңға шығуы әбден мүмкін. Осыған орай, бұл жас ойыншыларға жақынырақ назар аударуды ұсынамыз.

Шерхан Қалмұрза мен Саятхан Құсайыновта бәрі әлі алда. Олардың жасы небәрі 17-де, бұл қақпашылар үшін өте жас кезең. Мысалы, Еуропаның ТОП-5 лигасында 2020 жылы қақпашылардың орташа дебют жасы 23,4 жасты құраған.

Дастан Сәтпаевтың алаңға шығу мүмкіндігі өте жоғары. Еске сала кетейік, жақында «Челсимен» келісімшартқа қол қойған «Қайраттың» жас шабуылшысы Freedom QJ League-да екі маусымда жалпы 28 матч өткізіп, 26 гол соғып, 10 нәтижелі пас берген. Ол өткен маусымның қорытындысы бойынша Лиганың ең құнды ойыншысы болып танылып, сондай-ақ QJ League All-Star құрамасының «Црвена Звездаға» қарсы матчына шақырылған еді.

Өткен жылдың мамыр айында Дастан Лига Кубогында негізгі команда сапында дебют жасап, «Ақжайыққа» қарсы матчтың соңында алаңға шықты. Қаңтардағы оқу-жаттығу жиындарында Сәтпаев ересектер футболындағы алғашқы голын соғып, «Дордой» қақпасын дәл көздеді. Кейіннен «Қайрат» түлегі «Пари НН» және махачкалалық «Динамоға» қарсы ойындарға негізгі құрамда шықты. Айта кету керек, Суперкубокқа дайындық аясында алматылықтар соңғы екі бақылау кездесуін жабық режимде өткізді: трансляциясыз, бастапқы құрамдар мен статистика жарияланбай.

Олжас Байбек алғашқы «ересектер» матчына өткен күзде қатысты – ол ҚПЛ-ның 23-турында «Тұранға» қарсы ойында алғашқы минуттан алаңға қосылды. Кейіннен Олжас Қазақстан чемпионатында тағы екі матч өткізіп, дебюттік голын соқты – оның құрбаны «Ордабасы» болды. 2023 жылғы Freedom QJ League маусымында жартылай қорғаушы 12 матч өткізіп, 3 гол соқты және Лиганың үздік жартылай қорғаушысы атанды. Олжас – «Қайрат Жастар» командасының негізгі ойыншыларының бірі: Бірінші лигада 53 матч өткізіп, 9 гол соқты.

«Қайраттың» QJ League-да өнер көрсеткен басқа ойыншыларының статистикасын да еске түсірейік. Данияр Ташпұлатов Freedom QJ League-да екі маусым өткізіп, 38 матчта 3 гол соғып, 16 нәтижелі пас берді. Ол да Сәтпаев сияқты 2024 жылғы Жұлдыздар матчы үшін Лига құрамасына шақырылған еді.

Әбілқайыр Абдрахманов 2023 жылғы маусымда Freedom QJ League-да 14 матч өткізіп, 1 гол мен 2 ассист жасады. Өткен жылы ол Бірінші лигада «Қайрат-Жастар» сапында ойнады: 21 матчқа қатысып, 2 гол соқты.

Исмаил Бекболат 2024 жылғы Freedom QJ League маусымында 19 матчта 16 гол соғып, 7 нәтижелі пас берді. Ал Рамазан Бағдат екі маусымда 26 ойын өткізіп, 23 гол және 8 ассист жасады. Ол 2023 жылғы маусымның үздік сұрмергені және үздік шабуылшысы атанып, сол жылы SuperBol құрамасына қарсы All Star Game-ге қатысты.

«Ақтөбе» ойыншылары туралы айтқанда, негізгі команда сапында ресми матчтарда ең көп минут өткізген футболшы – Аян Байдәулетов. Ол да Сәтпаев сияқты Лига Кубогында дебют жасап, «Тобылға» қарсы ойында негізгі құрамда алаңға шықты. Ал келесі матчта – «Жеңіске» қарсы кездесуде – Аян алғашқы нәтижелі әрекетін жасап, Хосе Севальосқа ассист берді.

Байдәулетов 2023 жылғы Freedom QJ League маусымында 15 матч өткізіп, 1 гол соғып, 5 нәтижелі пас берді. Сондай-ақ, ол Жұлдыздар матчы үшін Лига құрамасына шақырылды. Бұған қоса, Аян Бірінші лигада екі маусымда 37 матчқа қатысып, 4 гол және 1 ассист жасаған.

Мирас Уманиязов «Ақтөбенің» негізгі командасы сапында төрт матчқа қатысты, бірақ оның жалпы ойын уақыты Аян Байдәулетовке қарағанда аз – 72 минут (Аянда 89 минут).

Уманиязов ресми түрде ҚПЛ-2024-тің 1-турындағы «Қайсарға» қарсы матчта дебют жасады, алайда ол сол кездесуде тек қосымша уақытта алаңға шықты. Оған қарағанда, Лига Кубогындағы «Жеңіске» қарсы ойында әлдеқайда көп мүмкіндік алды – Мирас алғашқы 60 минутты алаңда өткізді. Сондай-ақ, жас ойыншы Конференция лигасының «Сараевомен» өткен қарымта матчында қосымша уақыттың екінші овертаймында 10 минут ойнап, қарсылас команда тек пенальти сериясының нәтижесінде келесі кезеңге өткенін атап өткен жөн.

Мирас 2023 жылғы Freedom QJ League маусымында 21 матч өткізіп, 4 гол және 3 ассист жасады. Ал 2024 жылғы маусымды жастар құрамасында өткізіп, Бірінші лигада 15 ойында 2 гол соқты.

Мирам Кикбаев «Ақтөбенің» негізгі командасы сапындағы дебютін Лига Кубогындағы Байдәулетовпен бір матчта жасап, алаңда 23 минут өткізді. Бұл – әзірге оның ересектер құрамындағы жалғыз ресми кездесуі. Кикбаев Freedom QJ League-да екі маусымда 25 матчқа қатысып, 11 гол мен 2 ассист жасады. Сонымен қатар, ол 2024 жылғы Бірінші лигада 27 ойын өткізіп, 4 гол соқты.

Қазақстан футбол федерациясы Суперкубоктың барлық билеті матчқа бір күн қалғанда толық сатылып кеткенін хабарлады. Демек, кездесуге қатысушыларды елдің басты стадионында жанкүйерлерге толы трибуналар алдындағы тартысты ойын күтіп тұр.

Турнир тарихында 20 жастан кіші тек сегіз футболшы ғана Суперкубок матчтарына қатысқан. Олардың бесеуі – «Қайрат» немесе «Ақтөбе» ойыншылары. Кім біледі, бәлкім, осы демалыста бұл тізім жаңа есімдермен толықтар?