Бауыржан Сағындық «Қарабах» ФК-да тағылымдамадан өтуде

«Қарабах» – Әзірбайжанның 12 дүркін чемпионы, сондай-ақ ел Кубогының сегіз дүркін иегері. Клуб еурокубоктарға тұрақты түрде қатысып келеді, ал биылғы маусымды УЕФА Чемпиондар лигасында өткізіп, жалпы кезеңнің аяқталуына бір тур қалғанда плей-оффқа шығуын іс жүзінде қамтамасыз етті.

«Бұл тағылымдама Pro лицензиясын алу аясында өтіп жатыр және мен үшін өте құнды әрі бірегей тәжірибе болды. «Қарабах» – ерекше тарихы бар, қалыптасқан жүйесі бар клуб. Бұл жүйені бас бапкер Гурбан Гурбанов соңғы 18 жыл бойы үздіксіз дамытып келеді.

Осы уақыт ішінде ішкі чемпионатта да, халықаралық аренада да тұрақты нәтиже көрсетуге мүмкіндік беретін модель қалыптасты. Әсіресе, барлық жетістіктің негізінде жаттықтырушылар штабының ойыншылармен жүргізетін ауқымды әрі жүйелі жұмысы жатқанын көру ерекше әсер қалдырды. Мұнда басты басымдық – футболшыларды дамыту және батыл, агрессивті ойын стилі», – деп бөлісті Бауыржан Абаевич.

Айта кетейік, Бауыржан Сағындық Қазақстанның U17 жасөспірімдер құрамасының аға жаттықтырушысы болып табылады. Оның жетекшілігімен Қазақстан жасөспірімдері Еуро-2026 іріктеу кезеңінің элиталық раундына жолдама алды.