Стереотиптерді бұзу: футбол әлеміндегі әйелдің рөлі

Осы маңызды мереке қарсаңында біз Лигада және клубтарда жұмыс істейтін ханымдарға бір сұрақ қойдық – футболдағы әйел болу қандай? Назарларыңызға олардың жауаптарын ұсынамыз.

Наргиз Нысанова, «Қайрат» футбол клубының академия менеджері: Футболда әйел болу – бұл тек қана сын-қатер емес, сонымен қатар үлкен артықшылық. Мен өз жұмысымның спортта жұмыс істеуді қалайтын басқа әйелдерге үлгі бола алатынын мақтан тұтамын. Футболдағы әйелдер барған сайын көріне түсуде, және бұл керемет шабыт береді.

Тамара Ахметали, Freedom QJ League менталдық дайындық жөніндегі сарапшысы: Мен үшін футболда әйел болу – бұл стереотиптерді еңсеру, кедергілерді бұзу, бірегейлікті сезіну және қолдауды сезіну, сондай-ақ басқаларға үлгі болу мүмкіндігі.

Анель Жұмабекова, «Тобыл» ФК маркетологы: Футболда қыз болу – бұл осы спорт түрінің дамуына үлес қосу, стереотиптерді бұзу және өзгелерге шабыт беру. Клубта жұмыс істей отырып, мен футболдың адамдарды біріктіретінін, эмоциялар сыйлайтынын және жаңа мүмкіндіктер ашатынын көремін. Бұл жай ғана ойын емес – бұл әркімге, жынысына қарамастан, орын табылатын тұтас мәдениет.

Салтанат Әбдіжаппарова, «Оңтүстік» ФК медиа-офицері: Мен үшін футболда әйел болу, әсіресе медиа-офицер ретінде – бұл жаңа әрі қызықты тәжірибе. Бұл – миллиондар сүйетін ойын туралы баяндауға, оның атмосферасына енуге және тез әрекет ету, сапалы контент жасау мен стереотиптерді бұзу маңызды болып табылатын салада дамуға мүмкіндік. Бұл кәсібилікті, жауапкершілікті және футболға деген шексіз сүйіспеншілікті талап ететін жұмыс. Және мен осындай үлкен, біртұтас команданың бір бөлігі болғаныма бақыттымын.

Жанна Мальгаждарова, Freedom QJ League сарапшы-аналитигі: Футболда қыз болу – бұл керемет шабыт береді! Команданы жаттықтыру, ойыншыларды дамыту жолында бағыттау және олардың жетістіктеріне үлес қосу – үлкен күшті, білімді және ойынға деген сүйіспеншілікті қажет етеді. Сонымен қатар, бұл белгілі бір сын-қатер, өйткені бапкерлік рөлдегі әйелдер жиі әртүрлі пікірлерге тап болады. Бірақ бұл тек күш пен сенімділік бере түседі!

Анна Черненко, «Оңтүстік» ФК маркетологы: Футбол клубындағы жұмыс – мен үшін жай ғана мамандық емес, бұл – өмір салты. Мұнда сырттай бақылаушы болып қалу мүмкін емес – сен әр матчты, әр голды, жанкүйерлердің әр толқынын бірге сезінесің. Маған ойын алдындағы кернеу ауада ілініп тұрған сәт, жанкүйерлер дауысын жоғалта айқайлаған кез, команда алаңға шыққан сәт ерекше ұнайды. Өйткені сен де осы үлкен футбол әлемінің бір бөлігісің. Бұл мен үшін жай ғана жұмыс емес – бұл ойынның ішінде болу, оның ырғағын сезіну және барша жанкүйермен бірге әр жеңісті және әр сынақты бастан кешіру мүмкіндігі.

Айдана Қуанышбаева, QJ League командаларының медиа-офицері, «Алтай» ФК: Футболдағы қыз болу – бұл «футбол тек ерлерге арналған» деген стереотиптерді бұзу және өз командаңның әрбір жеңілісін жүрекке жақын қабылдау.

Ләйлә Ақылбекова, QJ League командаларының дәрігері, «Жетісу» ФК: Футбол – бұл керемет нәрсе, онсыз өміріңді елестету мүмкін емес. Бір кездері ол маған эмоционалды тұрғыда қатты көмектесті. Мұнда сен әйел екеніңді ұмытып, жай ғана «Док» боласың. Футбол миллиондаған адамды біріктіреді, Лига танымал бола бастады, және осы жобада жұмыс істеу өте қызықты болды. QJ League жобасына алғысым шексіз!

Амина Мұхтарова, QJ League командаларының медиа-офицері, «Ертіс» ФК: Футболда қыз болу – бұл ойынға деген махаббаттың өмір салтына айналуы. Мен осы ырғақпен өмір сүремін және шын жүректен ұнататын жұмысымды тапқаныма қуаныштымын. Мұнда мен үлкен отбасымды – әрқашан қолдау көрсетіп, идеяларымды құптайтын әріптестер мен ойыншыларды таптым. Маған сенім артады, ал бұл – ерлер ұжымында жұмыс істегенде өте маңызды.

Наталья Иванова, «Жас Қыран» U-18 бас бапкерінің ассистенті: Футболда әйел болу – бұл командалық жұмыс, алаңдағы өзара әрекеттестік және сенім мен қолдаудың маңыздылығын түсіну. Сондай-ақ, бұл тек денені ғана емес, рухты да нығайтатын менталдық денсаулық. Спорттық белсенділік позитивті ойлауды дамытуға көмектеседі. Бұл – гендерлік теңсіздікпен күрес. Жаттығу процесі арқылы сен өзіңе және өз күшіңе деген сенімділікті арттырасың!