Чемпион анықталды ма? Freedom QJ League W 11-турына шолу

Күтпеген нәтиже «Қайраттан»

Алматылық команда тағы да жеңіске жетті, бірақ «Ордабасымен» ойындағы есепті таңқаларлық деуге болады – маусымда алғаш рет «сары-қаралар» тек бір ғана гол соқты.

Жеңісті командасына Оксана Никитченко сыйлады – ол 7-минутта Сабина Үсеннің қақпасын дәл көздеді. Бұдан кейін «Қайрат» шабуылы ештеңе істей алмады, бірақ оң нәтиже үшін осы да жеткілікті болды.

Әдетте әр турда үстемдік ететін «Қайрат» қатарынан екінші рет минималды айырмашылықпен жеңіске жетті. Дегенмен, Оксана Коханнаяның командасы чемпиондықты іс жүзінде қамтамасыз етті – ресми түрде ол келесі ойын аптада рәсімделуі әбден мүмкін.

«Ертіс» – «Астананың» үмітін үзді

Павлодар командасы астанада жеңісті жұлып алды. 28-минутта Әльзия Жамбыл есеп ашқанымен, «Ертіс» төрт голмен жауап берді – Айсана Ахмедиян мен Елизавета Медведева дубль жасады. Асыл Пазыл бір гол соқты, бірақ бұл жалпы жағдайды өзгерте алмады – «Астана» 2:4 есебімен ұтылды.

Енді елордалық клубқа күміс жүлдеге деген мүмкіндігін бекемдеу ғана қалады – алтын тек теория жүзінде мүмкін.

Талдықорғанда голдық феерия

«Жетісу» мен «Шахтер» өте нәтижелі матч өткізді – қос команда 16 гол соқты. Оның 11-і қарағандылықтардың еншісінде. «Золушка» атанған команда сапында Дамира Мақсат (3 гол, 2 пас) пен Рената Юсупова (2+2) ерекше көзге түсті.

Ал «Жетісуда» басты қаһарман Нұрай Болатова болды – ол хет-трик жасап, бір нәтижелі пас берді. Сондай-ақ Балжан Төлеміс пен Нұрай Бақытслан да гол соқты.

Қолаға бес үміткер

«Тобыл» мен «Ақтөбе» тең ойнады – Әсел Санаттың голын Анастасия Мельникованың автоголы қайтарды.

Маусымның аяқталуына үш тур қалғанда үшінші орын үшін күрес әлі де шиеленіскен күйінде қалуда – оған «Ертіс», «Шахтер», «Тобыл», «Ордабасы» және «Ақтөбе» қатысып отыр. Бұл тізімдегі бірінші мен соңғы команданы небәрі үш ұпай бөліп тұр – маусымның соңғы бөлігі қызықты болатыны сөзсіз.