Көшбасшылар шайқасы және «Қазақстандық дерби»: Freedom QJ League W турнирінің екінші туры алдындағы маңызды жайттар

«Жетісу» – «Астана»

Талдықорғандық арулар алғашқы турда сырт алаңда «Қайраттан» ауыр жеңіліске ұшырап, қақпасына жауапсыз 11 гол жіберіп алды. Енді олар өз алаңында алғашқы ойынын өткізеді – қонаққа «Астана» келеді.

Еске салайық, елордалық команданың шабуылшысы Асыл Пазыл өткен жылы 2008–2009 жылы туған қыздар арасындағы Қазақстан чемпионатының үздік сұрмергені атанған болатын. Freedom QJ League турнирінің алғашқы турында 14 жастағы футболшы қыз өз алаңында «Тобылдың» қақпасына гол соғып, биыл да биіктен түспейтінін аңғартты. Енді ол алғашқы сырт алаңдағы голын осы сенбіде соға ала ма?

«Шахтер» – «Тобыл»

Екі команда да алғашқы матчтарында жеңіліске ұшырады – демек, екінші турда олардың кемінде біреуі турнир кестесіндегі «ұпай» бағанында нөлден құтыла алады. «Шахтер» «Ертіс» қақпасына бір жауапты гол соғып (1:5 есебімен жеңілді), өз жанкүйерлерін аз да болса қуантса, «Тобыл» «Астанадан» екі гол жіберіп алып, жауап қайыра алмады.

2024 жылы футболшы қыздар 2008-2009 жылы туғандар арасындағы Қазақстан чемпионатында тартысты матч өткізген болатын – сол кездесуде «Тобыл» 3:2 есебімен жеңіске жетті. Ол ойында гол соққан ойыншылардың басым бөлігі биылғы Лига маусымында да өнер көрсетіп жүр: костанайлық команда сапында Варвара Цой мен Амура Карабаева, ал «Шахтер» құрамында Малика Сәрсен мен Саида Дүйсембаева. Демек, былтырғы қарсыластар биыл да алаңда жолығады.

«Ертіс» – «Ордабасы»

Өткен демалыста мыңдаған жерлестері көз алдында Лигадағы жолын сенімді жеңіспен бастаған павлодарлық футболшы қыздар енді 2008–2009 жылы туған ойыншылар арасындағы былтырғы Қазақстан чемпионатының жеңімпаздарымен кездеседі.

Айта кету керек, Шымкент командасының биылғы маусымдағы құрамы былтырғы құрамнан айтарлықтай өзгеше: кейбір ойыншылар ересектер арасындағы турнирлерге ауысып, олардың орнына 2010–2011 жылы туған футболшы қыздар келді.

Соған қарамастан, бұл «Ордабасы» да мықтылығын дәлелдеп үлгерді – алғашқы турда қыздар «Ақтөбені» 3:0 есебімен тас-талқан етті. Голдардың авторлары – 15 жастағы Диана Ситникова мен 14 жастағы Балнұр Ергешбек.

Айта кетейік, павлодарлық команда құрамында да жастары кіші ойыншылар бар – мысалы, биыл 14 жасқа толған Айсана Ахмедиян «Шахтер» қақпасына екі гол соқты.

«Ақтөбе» – «Қайрат»

Бұл матч ел футболының бай тарихына ие екі клуб арасындағы тартысты қарсыластықтың жаңа кезеңіне айналады – Freedom QJ League тарихында алғаш рет «қазақстандық дербиде» алаңға қыздар шығатын болады.

Мұнда 2008-2009 жылы туған ойыншылар арасындағы Қазақстан чемпионатын қайта еске түсіру артық етпейді. Біріншіліктің үшінші туры Ақтөбеде өткен болатын – және алаң иелері болашақ күміс жүлдегерлерді 2:1 есебімен жеңіп шықты. Сондықтан бұл жолы да қос командада қарымта қайтаруға және жарқын ойын көрсетуге жеткілікті мотивация бар.