Freedom Media Cyber Cup: Абраев пен Шарабадин қарымта кездесуге дайын

Турнирге «Қайсар» командасынан Данияр Шарабадин мен «Астана» өкілі Максат Абраев қатысуда. Олар өткен жылғы турнирде тамаша өнер көрсетіп, жартылай финалда жолыққан болатын. Сол кезде Абраев жеңіске жетіп, кейін финалда Бахтияр Алдашевке жол берген еді.

«Өткен жылғы турнир өте жоғары деңгейде өтті, маған қатты ұнады, жақсы тәжірибе болды, бірақ жеңіліс өкінішті болды. Жеңемін деп ойладым. Биылғы турнирде мақсатым биік, күшейдім, тек жеңіске жеткім келеді», – деді Шарабадин турнир алдындағы сұхбатында.

Данияр команда таңдауда нақты шешімін айтты: «Егер бірінші болып таңдау жасасам, міндетті түрде «Реалды» аламын. Өйткені «Барсаға» жанкүйермін, бірақ «Реал» биыл ойында өте мықты, карталары өте жақсы. Солармен ойнаған ұнайды».

Ал Абраев «Реалдан» бөлек, «Бавария» мен «ПСЖ» клубтарын да қарастырып жүргенін айтты: «Оларда шабуылшы ойыншылар жылдам, дриблинг пен аяқтауы жақсы», – деп түсіндірді ол.

Максат: «Өткен жылғы турнир жоғары деңгейде ұйымдастырылды, бірақ эмоционалды жағынан мен үшін бәрі ойдағыдай болмады», – деп мойындады.

Енді ол финалдағы жеңіліс үшін кек қайтаруға мүмкіндік алады. Сонымен қатар, Абраев пен Шарабадин бір топқа түсті, бұл Данияр үшін қосымша мотивация болмақ.



Айта кетейік, футболшылар арасындағы финалдық кезең мен барлық тіркелгендер үшін ашық біріншілік 15 маусым күні Mega Silk Way СОО-да өтеді.

Басталуы – 16:00, тіркеуді растау – 15:00-де.