«Болашақтың бапкері»: САБ жоба қатысушыларының есімдерін жариялады

«Болашақтың бапкері» – Лига тарихындағы алғашқы жоба. Оның мақсаты – маусым барысында үздіксіз әдістемелік сүйемелдеу арқылы футбол орталықтарындағы дарынды мамандарды жеке дамыту.

Қазіргі заманғы спорт үздіксіз оқытуды талап етеді. Бұл жобаның міндеті – үнемі өзгеріп отыратын кәсіптік талаптарға сай келетін және қазақстандық жасөспірімдер футболының әлемдік деңгейдегі бәсекеге қабілеттілігін сақтай алатын жаттықтырушыларды даярлау. Бұл – икемділік пен бейімделгіштік, эмоциялық тұрақтылық, тактикалық сауаттылық, көшбасшылық пен тиімді коммуникация, сондай-ақ аналитикалық және стратегиялық ойлау сияқты түрлі қасиеттер мен дағдылардың үйлесімі.

Ақпан мен наурыз айларында өткен алғашқы кезеңнің мақсаты – жобаға қатысуға ең лайық футбол орталықтарының болашағы зор мамандарын анықтау болды. Freedom QJ League САБ сарапшылары маусымға қатысып жатқан 54 команданың жаттықтырушылар құрамының жұмысын мұқият саралап, заманауи цифрлық құралдарды да пайдаланды.

Одан кейін, сәуір мен мамыр аралығында Лига сарапшылары жобаға іріктеу критерийлерін анықтап, басты үміткерлерді іріктеп шықты. Нәтижесінде САБ жобаның қатысушылары ретінде келесі бес маманды таңдады: Лига A-дан Ербол Мұсабаев («Астана»), Игорь Солошенко («Шахтер»), Искандер Геймат («Ордабасы»), және Лига B-дан Даулет Базарбаев («Хан-Тенгри»), Есымбек Нұрахметов (ҚФФ Академиясы).

Жол картасының үшінші кезеңі маусым айында басталады. Бұл кезеңде әрбір жаттықтырушымен жеке жұмыс жоспары әзірленіп, ол күнделікті жұмыс процесіне енгізіледі және чемпионат бойы спорттық-аналитикалық блок тарапынан сүйемелденеді.

Сонымен қатар, шілде және қыркүйек айларында Лига сарапшылары жоба қатысушыларының басшылығындағы командалардың ойын деңгейін аралық бағалап, өзгерістер динамикасына талдау жүргізеді. Осы нәтижелер негізінде жеке жұмыс бағыттары түзетіледі. 23 тамызда өтетін QJL ALL-STAR және мадридтік «Атлетико» арасындағы матчта жоба қатысушылары өз шеберліктерін халықаралық деңгейде көрсету мүмкіндігіне ие болады.

Бағдарлама қорытындылары қарашада жасалады – маусым нәтижелері бойынша САБ әрбір жаттықтырушының даму үдерісіне жеке баға береді және олардың әрі қарай кәсіби өсуі үшін жеке жоспар ұсынады.