Әртүрлі матчтар: Freedom QJ League W алтыншы турына шолу

Шымкенттегі голсыз ойын

Қазақстанның оңтүстігінде жұма күні аптап ыстық болды. Ойын таңғы 10-да басталғанымен, термометр бағаны 30 градусқа дейін көтерілді. «Ордабасы» мен «Тобыл» футболшы қыздары үш мәрте су ішу үшін үзіліс жасады, бірақ мұндай ауа райында командалардың ешқайсысы нәтижелі шабуылмен көзге түсе алмады. 0:0 – маусымдағы алғашқы голсыз тең ойын.

«Ақтөбе» қарқын ала бастады

Сергей Поленов командасының дағдарысы жалғасуда: «Ақтөбе» футболшы қыздары Қарағандыда екі жауапсыз гол соқты. Гол авторлары — Азиза Талап пен Маулуда Армат. Маусымды қатарынан төрт жеңіліспен бастаған «қызыл-ақтар» тығыз турнирлік кестеде жеңіске жетіп, сәтсіз сериясын тоқтатты. Өткен аптада Азамат Житписбаев шәкірттері «Жетісуды» жеңген еді. Екінші орынға дейін — алты ұпай, соңғы орынға дейін де — алты ұпай. Ал «Золушка» командасы қатарынан екінші матчта гол сала алмай жүр – джокер ойыншылардың кетуі айқын әсер еткен сияқты.

Павлодарда он бір гол

«Ертіс» «Жетісуға» еш мүмкіндік қалдырмады. Талдықорғандық қонақтар он гол жіберіп, тек бір рет жауап қайырды – престиж голының авторы — Айнұр Ануарбек. Жеке статистиканы ерекше жақсартқандар: Елизавета Медведева (үш гол, үш ассист) және Валерия Косарева (дубль және үш нәтижелі пас). Сондай-ақ гол соққан ойыншылар: Полина Арланова (дубль), Айсана Ахмедиян, Мунира Сарсенова және Айша Сәрсембекова. Бір ойында бес турдағыдан көп гол соққан «Ертіс» жүлделі үштікке еніп, «Шахтерді» ығыстырды.

Екі астананың кездесуінде интрига болған жоқ

Алматыда өткен «Қайрат» пен «Астана» матчында 12 гол соғылды, бірақ тең күрес болмады – алаң иелері 9:3 есебімен жеңіске жетті. Екі Ангелина – Клёнова мен Остер – және Милена Николенко хет-трикпен ерекшеленді, ал Милена бұдан бөлек екі нәтижелі пас берді. Қонақтар сапынан Асыл Пазыл «Ордабасымен» сәтсіз матчтан кейін пенальтимен және ойындағы екінші голымен дубль жасап, София Рыбакқа пас шығарды. Бірінші айналымның соңғы турында «Қайрат» «Астанадан» алты ұпайға алда келе жатыр, ал елордалық команданың өкшесін басып келе жатқан қуғыншылар аз емес.