Толенди тағы да покер жасады: Freedom QJ League B-дің 14-турындағы жарқын сәттер

«Оқжетпестің» ерік-жігерлі жеңісі

Көкшетаулық команда жүлделі орындар үшін күресті жалғастыруда – бұл турда «Алтайға» қарсы ойында ұпай жоғалтуы мүмкін еді, бірақ үш ұпайды жұлып алды.

Кездесудің қаһарманы Тимур Тиржанов болды. Алдымен ол 55-минутта есеп ашты, кейін «Алтай» ойыншысы Ғалым Ернарұлы есепті теңестірген соң, қосымша уақытта пенальтиді сәтті орындап, командасын қайта алға шығарды.

Чемпионаттың аяқталуына төрт тур қалғанда «Оқжетпес» 27 ұпаймен үшінші орында тұр. Алдында тек «Оңтүстік» (31) және КФФ Академиясы (29).

Толенди маусымдағы үшінші покерін жасады!

КФФ Академиясы «Елімайды» 6:0 есебімен ойсырата жеңді – көрермендердің бар назары 14 жастағы Ануар Толендиге ауды.

Ол командасының алғашқы төрт голын соқты. Кейін есепті түпкілікті Никита Лисохмар (1 гол, 2 пас) мен Давид Заречный (1+1) толықтырды.

Естеріңізге сала кетсек, жас жартылай қорғаушы маусымды «Астана» 2010 құрамында бастаған болатын. Freedom QJ League U16 турнирінде ол небәрі алты матчта он гол соғып, екі рет покер жасаған. Содан кейін үлкендермен ойнай бастады – және бұл оған кедергі болмады. Толендидің жаңа команда сапында төрт ойында алты голы бар, ал алда тағы төрт тур күтіп тұр.

«Оңтүстік» жеңісті сериясын жалғастыруда

Шымкенттік команда өз алаңында «Ұлытауды» қабылдап, еш қиындық көрмеді – көшбасшылар 3:0 есебімен жеңіске жетті.

Есепті ойынның 3-минутында Жан Рахымжанов ашты. Артықшылықты Алихан Әли нығайтты – ол бірінші тайм соңында және 75-минутта екі гол соқты.

Сондай-ақ Темірлан Ермекті ерекше атап өту керек – ол командасының үш голының екеуіне пас берген.