Басты интрига – жүлделі үштікте: Freedom QJ League W 12-турына шолу

«Астана» Шымкентте ұтылды!

Бұған дейін біз «Қайраттың» «Шахтерді» ойсырата жеңіп, чемпиондықты мерзімінен бұрын рәсімдегенін жазғанбыз. Анықталғандай, бұл тіпті алматылықтар «Золушкаларға» есе жіберген күннің өзінде де орын алар еді – өйткені «Астана» «Ордабасыны» жеңе алмады.

Шымкенттіктер есепті 15-минутта ашты – голдың авторы Диана Ситникова. Қонақтар пенальти арқылы таразы басын теңестіре алар еді, алайда Сабина Үсен Әльзия Жамбылдың соққысын қайтарды. Екінші таймда Милана Ализде есепті еселей түсті. «Астана» 66-минутта Әлия Боранбайдың соққысымен ғана гол соға алды.

Алайда камбэк басталмады – 77-минутта Айзере Мамыт оңтүстік командасының үшінші голын салды. «Астана» араға екі минут салып Әльзия Жамбылдың голымен жауап берді, бірақ таразы басын теңестіре алмады – 3:2, «Ордабасының» пайдасына.

Интрига сақталуда

«Астананың» жеңілісі тек шымкенттіктер үшін емес, «Ертіс» үшін де тиімді болды. Павлодарлық команда өз алаңында «Тобылды» Елизавета Медведеваның дублі арқасында ұтып, күміске деген математикалық мүмкіндігін сақтап қалды.

Чемпионаттың аяқталуына екі тур қалғанда «Ертістің» «Астанадан» қалып келе жатқан айырмасы – 5 ұпай. Бұл ретте елордалық клуб келесі турда «Қайратпен», соңғы ойында «Шахтермен» кездеседі. Ал Ксения Постова шәкірттері «Жетісу» мен «Ақтөбеге» қарсы ойнайды. «Ертіске» қалған матчтарын жеңіп, қарсыластарының сүрінуін күту ғана қалады. «Астана» болса, енді жүлделі үштіктен шықпайды – кем дегенде қола жүлде оған кепілденген.

«Ақтөбе» «Жетісуды» таптап өтті

«Жетісу» әлі де ұпай ала алмай келеді. Талдықорғандық клуб үшін «Ақтөбеге» сапар сәтсіз аяқталды – «қызыл-ақтар» қарсыластың қақпасына 12 гол соқты.

Осы ойында әсіресе Азиза Талап (хет-трик және пас), Әлия Самат (2+2), Малика Аскарова (2+1) және Айжан Есіркепова (дубль) көзге түсті. Сондай-ақ Томирис Балниязова, Айзере Қуанышқали және Гүлден Сакирова бір-бір голдан соқты.

Нәтижеге «Жетісудың» негізгі ойыншысы Нұрай Болатованың 64-минутта екінші сары қағаз алып, алаңнан қуылуы да әсер етті.

Қызығы, бұл кездесуде бірден бес қақпашы алаңға шықты – «Ақтөбеде» Ангелина Жданованы дебютант Мария Татаринова алмастырды, ал «Жетісу» қақпасын кезекпен Аруа Данекер, Арина Стеблянко және Еркежан Жалтай қорғады.