Басты турнир қайта оралды: Freedom QJ League-тің 16-турына шолу

«Ордабасы» – «Тобыл»: қостанайлықтарда күш қалды ма?

Бір қарағанда, шымкенттіктердің басымдығы байқалады. Себебі «Тобыл» осы аптада «Жас Қыранмен» 12-турдағы кейінге шегерілген матчын өткізіп, біраз шаршауы мүмкін. Дегенмен, Олег Лотовтың шәкірттері дәл сол ойында сенсация жасап, биыл алғаш рет алматылықтарды жеңді.

«Ордабасыға» ұпай жоғалтудың жөні жоқ – маусымның аяқталуына жеті тур қалғанда, олар үшінші орыннан төрт ұпайға қалып келеді. Сондықтан алдағы кездесу өте қызықты болғалы тұр.

«Жас Қыран» – «Шахтер»: «кеншілер» алматылықтарды қуып жете ме?

Аптаның орталық ойынында қарағандылықтар «Тобылдың» жасаған мүмкіндігін пайдалануға тырысады.

Алматылықтардың алғашқы жеңілісінен кейін олардың артықшылығы небәрі төрт ұпайға қысқарды. Егер осы демалыста «Шахтер» жеңсе, айырмашылық бар болғаны бір ұпай болады.

«Тараз» – «Каспий»: аутсайдер таңқалдыра ала ма?

«Каспий» турнир кестесінде қайта соңғы орынға түсті, себебі «Тобыл» кейінге қалған ойында жеңіске жетті. Қостанайлықтарда әлі «Ақтөбемен» өтетін матч бар, сондықтан арақашықтық ұлғаюы мүмкін.

Ақтаулықтар соңғы бес ойында жеңе алмай жүр. Дегенмен, осы кезеңде олар «Қайрат», «Қайсар» және «Ертістен» ұпай тартып алды. Ал маусым басында өз алаңында «Таразға» ұтылғаны есімізде – реванш мүмкіндігі олар үшін тартымды.

«Ақтөбе» – «Ертіс»: ымыра болмайды

QJL All Star-ға байланысты үзіліске «Ақтөбе» ауыр жеңіліспен кетті – өз алаңында «Ордабасыдан» 1:8 есебімен ұтылды. Енді олар жанкүйерлердің алдында ақталуға тырысады.

«Ертіс» болса, «Қайраттан» ойсырай жеңілгеннен кейін «Каспиймен» және «Қайсармен» тең ойнады. Павлодарлықтар әлі де «Шахтер» мен «Жас Қыранды» қууға ұмтылуда. Егер қарағандылықтардан айырмашылық бір ұпай ғана болса, алматылықтардан бес ұпай қалып келеді. Үмітті сақтау үшін қателесуге болмайды.

«Қайсар» – «Қайрат»: алматылықтарға оңай тимей ме?

«Қасқырлар» «тең ойын патшалары» атанып жүр – соңғы алты кездесудің бесеуінде тең түсті. Енді оларға тағы бір алматылық клубпен ойнау керек. «Қайрат» матчтың да, маусымның да фавориті болса да, интрига бар: бұған дейін «сары-қаралар» күтпеген жерден «Каспийді» жеңе алмаған болатын.

«Атырау» – «Астана»: Абраев жақсы формада

Тамыздың соңғы аптасы Максат Абраев үшін ерекше есте қаларлық болды. «Атлетиконың» қақпасына гол соққаннан кейін ол Алматыдан оралған соң «Астананың» жастар командасы сапында ойнап, соңғы минуттарда «Оқжетпеске» жеңіс әкелген голдың авторы атанды.

Енді оны Атырауда қиын сапар күтіп тұр. Ол командасына маңызды ұпай жинауға көмектесе ала ма?