Қыздар турнирінің өткен матчтарындағы басты сәттермен бөлісеміз.
«Қайрат» тағы да он гол соқты
«Сары-қаралар» қатарынан үшінші рет кемінде он гол соғып жеңіске жетті. Бұл жолы алматылықтар «Ордабасыны» 10:1 есебімен ойсырата ұтты.
Есеп 3-минутта-ақ Жания Махаштың голымен ашылды, ал шешуші кезең 32-39-минуттар аралығы болды: сегіз минут ішінде Оксана Никитченко, Милена Николенко, София Ягудина және Айя Муттари қарсылас қақпасын дәл көздеді. Командалар үзіліске 5:0 есебімен кетті.
Екінші таймда Мөлдір Бакирова мен Айым Құрмаш та гол соқты, ал Николенко мен Ягудина өз есептеріне екінші голдарын жазды. Тағы бір доп Мерей Рысқұлованың автоголынан кейін «Қайраттың» еншісіне түсті. Қонақтар 65-минутта Аруна Насиралидің голымен ғана жауап қайтарды – бұл шабуылшының маусымдағы алтыншы голы.
Алматылықтар сегіз матчта жалпы 51 гол соқты, бірақ турнир кестесінде әлі де екінші орында келеді.
«Астана» көш басында қалды
«Қайратты» жеңе алған жалғыз команда өз матчын да жеңіспен аяқтады, бірақ мүлде басқа мәнерде. Қостанайда «Астана» «Тобылды» 2:0 есебімен жеңді, екі гол да үзілістен кейін соғылды.
58-минутта Альзия Жамбыл есеп ашса, 83-минутта қорғаушы Айнель Сманова матчтың нүктесін қойды. Екі нәтижелі пасты да Жібек Марат берді.
Елорда командасы көшбасшылығын сақтап қалды – жеті жеңіс пен бір тең ойыннан кейін 22 ұпай. «Астана» турнирдегі ең үздік қорғаныс көрсеткішіне де ие: небәрі 6 гол жіберген.
«Қайрат» бір ұпайға артта келеді. Негізгі интрига әлі алда – чемпиондық тағдырын екі астананың дербиі шешетін секілді. Ал «Тобыл» 8 ұпаймен бесінші орында.
Крышкинаның дублі «Шахтерге» жеңіс әкелді
Қарағандыда алаң иелері «Қайсарды» 4:1 есебімен жеңді.
Қостанайдағы матч секілді, бірінші таймда гол соғылған жоқ. Ал үзілістен кейін Сабина Крышкина 48 және 56-минуттарда екі рет мергендік танытты. Бұл оның маусымдағы алғашқы голдары.
Қызылордалықтар жауап қайтара алды – 63-минутта Мадина Амантай есеп айырмасын қысқартты. Алайда екі минуттан кейін Зайлин Ерсаин қарағандылықтардың басымдығын арттырды, ал 76-минутта қорғаушы Дария Тулегенова қорытынды есепті белгіледі.
«Шахтер» 11 ұпай жинап, үшінші орынға барынша жақындады. Ал «Қайсар» сегіз турдағы жетінші жеңілісіне ұшырады: 3 ұпай, 5 гол соғып, 37 гол жіберген – соңғы екі көрсеткіш те лигадағы ең нашар нәтиже.
Павлодардағы драма
Турдың ең тартысты концовкасы «Жұлдыз» стадионында өтті. «Ертіс» «Ақтөбені» қабылдап, 2:1 есебімен жеңісті жұлып алды.
Бірінші таймның компенсаторлық уақытында Анастасия Гордеева есеп ашты, бірақ 61-минутта Айжан Есіркепова таразы басын теңестірді. Матч тең аяқталатындай көрінген, алайда кездесудің соңғы сәттерінде Диляра Капанова жеңіс голын соқты.
Павлодарлықтар үшін бұл маусымдағы небәрі екінші жеңіс, бірақ аса маңызды үш ұпай болды: «Ертіс» ұпай саны бойынша «Ордабасыны» қуып жетті – екі командада да 7 ұпайдан. Ал «Ақтөбе» қуғыншылардан ұзап кету мүмкіндігін пайдалана алмады және 11 ұпаймен үшінші орында қалды. Бұл ретте «қызыл-ақтарды» «Шахтерден» тек қосымша көрсеткіштер ғана бөліп тұр.
8-турдан кейінгі үздік сұрмерген: Милена Николенко («Қайрат», 13 гол).
8-турдан кейінгі үздік ассистент: Жания Махаш («Қайрат», 9 нәтижелі пас).
