Freedom QJ League B 12-турының матчтары қалай өткенін баяндаймыз.
Хусеннің дублі және «Жеңістің» қатарынан төртінші жеңісі
Чемпионат көшбасшысы «Астана Аренада» «Алтайды» 3:1 есебімен жеңді.
Есеп бірінші минутта-ақ ашылды: Даут Хусен жылдам голдың авторы атанды. Дегенмен 53-минутта «Алтай» шабуылшысы Даулет Даутбаев таразы басын теңестірді.
Матчтың барысын Ильяс Серикбаевтың алаңға шығуы өзгертті – жартылай қорғаушы 58-минутта ойынға қосылып, 70-минутта «Жеңісті» қайта алға шығарды. Ал компенсаторлық уақытта Хусен екінші голын соғып, кездесудің нүктесін қойды.
Ойын тартысты өтті – төреші перспективалы шабуылдарды тоқтатқаны және спорттық емес әрекеттері үшін жалпы жеті сары қағаз көрсетті.
Нәтижесінде «Жеңіс» 30 ұпай жинап, жеңісті сериясын төрт матчқа дейін ұзартты. «Алтай» оныншы рет жеңіліп, 4 ұпаймен соңғы орында қалды. Ал Даутбаев маусымдағы жетінші голын соқты – бұл командасының барлық голының (12) жартысынан астамы.
Қуғыншылар минималды жеңістермен жауап берді
«Жеңістің» соңынан келе жатқан екі команда да үш ұпайдан алды, алайда әлдеқайда қарапайым есеппен жеңіске жетті.
«Жайық» өз алаңында «Елімайды» 2:1 есебімен жеңді. Қонақтар 17-минутта қорғаушы Анас Адылхановтың голынан кейін есеп ашты, алайда үзіліске дейін алаң иелері ойынды өз пайдасына өзгертті: 35-минутта Артем Бербеко, ал 39-минутта Алексей Побережный мергендік танытты. Екінші таймда гол соғылған жоқ.
«Хан-Тәңіріне» болса бір голдың өзі жеткілікті болды: «Жетісуға» қарсы кездесу ұзақ уақыт бойы голсыз өтіп, тек 77-минутта қорғаушы Ильяс Шукебаев қонақтардың қақпасын дәл көздеді.
Енді екі команданың да еншісінде 24 ұпайдан бар – өзара кездесулердегі басымдығының арқасында «Жайық» жоғары тұр.
«Оқжетпес» Шымкентте сенімді жеңіске жетті
Көкшетаулық команда турдағы ең ірі жеңіске қол жеткізіп, «Оңтүстікті» 3:0 есебімен ұтты.
35-минутта Альмерек Карбаев есеп ашса, 44-минутта Даниил Семенюк басымдықты арттырды. Үшінші голды 86-минутта Карбаевтың орнына алаңға шыққан Динмухамед Жакупов соқты.
20 ұпай жинаған «Оқжетпес» төртінші орнын нығайтып, жүлделі аймақтан небәрі төрт ұпайға қалып келеді. Ал Freedom QJ League B турнирінің екі дүркін чемпионы қатарынан екінші рет жеңіліп, бесінші орында тұр.
Ауыстыру «Атырауға» жеңіс әкелді
«Атырау» мен «Қызылжар» матчында голды ұзақ күтуге тура келді – кездесудегі жалғыз доп 68-минутта соғылды. Оның авторы үзілістен кейін ғана алаңға шыққан қорғаушы Ярослав Бортник болды.
Кездесу өте тартысты өтті – екі командаға жалпы жеті ескерту көрсетілді, олардың қатарында жеңіс голының авторы да бар.
«Атырау» 15 ұпаймен жетінші орында орналасқан. «Қызылжар» тоғызыншы орында қалып, гол соғуда қиындық көріп келеді: 9 гол – турнирдегі ең төмен көрсеткіш.
12-турдан кейінгі үздік сұрмерген: Жанади Жумабек («Хан-Тәңірі», 9 гол).
12-турдан кейінгі үздік ассистент: Нуралы Сабыржан («Оқжетпес», 5 нәтижелі пас).
