В лигасының алтыншы туры жанкүйерлерге футбол эмоцияларының бүкіл спектрін сыйлады — таблодағы прагматикалық нөлдерден бастап, таңғажайып камбэктер мен голдар тартысына дейін. Көшбасшылар өз мәртебесін дәлелдесе, аутсайдерлер әрбір мүмкіндікке жармасуды жалғастыруда.
«Жетісу» — «Қызылжар»
«Жетісу» мен «Қызылжар» арасындағы матч Талдықорғанда турдың шымылдығын түрді. Тартысты өткен кездесуде есеп ашылмай, 0:0 есебімен тең аяқталды. Петропавлдықтар үшін бұл маңызды жетістік — олар үшінші турда «Атырауды» жеңгеннен кейін алғашқы ұпайларына қол жеткізді.
«Хан-Тәңірі» — «Алтай»
«Хан-Тәңірі» соңғы орында келе жатқан «Алтайды» 1:0 есебімен минималды есеппен тізе бүктірді. Матчтағы жалғыз голды Жәнәді Жұмабек соқты. Осы табыстың арқасында алматылық ұжым үш ұпайды еншілеп, үздік үштікте сенімді түрде келе жатыр.
«Атырау» — «Жеңіс»
«Жеңіс» тартысты бәсекеде «Атыраудан» қонақта жеңісті жұлып алды. «Мұнайлы» астанадағы матч елордалық ұжымның пайдасына 2:3 есебімен аяқталды. «Жеңіс» өзінің мінезін көрсетіп, «Хан-Тәңірі» мен «Жайықты» өкшелей қууды жалғастыруда.
«Елімай» — «Оқжетпес»
«Елімай» мен «Оқжетпес» жанкүйерлерге түрлі оқиғаға толы нағыз футбол триллерін сыйлады. Семейліктер бірінші болып қақпаларына гол жіберіп алды — қонақтар сапынан Арсен Арапов көзге түсті. Алайда кейін «Елімай» белсенділік танытып, 20 және 21-минуттарда Санжар Бекеновтың соққан дублінің арқасында есепті теңестірді. Айта кетерлігі, екі жағдайда да оған Әнәс Әділханов алыстан дәл бағытталған пастарымен ассистенттік жасады. Бірақ алаң иелері басымдықты сақтап қала алмады: «Окжетпес» төрт голмен жауап қайтарып, 2:5 есебімен жеңіске жетті. Кездесудің басты қаһарманы — хет-трик авторы атанған Арсен Арапов болды, ол бұл ойында «көкшетаулықтардың» бірінші, төртінші және бесінші голдарын соқты.
«Жайық» — «Оңтүстік»
Тур Оралдағы матчпен мәресіне жетті. «Жайык» өз алаңында «Оңтүстікті» 2:0 есебімен сенімді түрде ұтты. Бұл жеңіс оралдық командаға маңызды ұпайларды еншілеп, қосымша көрсеткіштер бойынша турнирлік кестенің басында қалуға мүмкіндік берді. Көшбасшының соңынан «Хан-Тәңірі» мен «Жеңіс» тығыз топпен ілесіп келеді.
