Freedom QJ League сегізінші туры жанкүйерлерге жарқын камбэктер мен күтпеген нәтижелер сыйлап қана қоймай, лига тарихын қайта жазды. Өткен ойын күндерінің басты оқиғаларын назарларыңызға ұсынамыз.
Жігерлі «Тобыл» және Алматыдағы сенсация
Тур бағдарламасын Қостанайдағы текетірес ашты. «Астанадан» келген қонақтар ойынды ширақ бастап, есепті бірінші болып ашты. Алайда «Тобыл» нағыз мінез көрсетті: алаң иелері жауап ретінде қарсылас қақпасына жауапсыз үш доп енгізіп, матчты сенімді жеңіспен аяқтады — 3:1. Кездесудің басты қаһарманы — дубль жасаған Ислам Жантасов.
Турдың басты сенсациясы Алматыда орын алды. Медаль үшін күрес жүргізіп жатқан «Жас Қыран» өз алаңында күтпеген жерден сүрініп, «Ақтөбеге» 1:2 есебімен есе жіберді. Қонақтар жоғары деңгейдегі жанқиярлық ойын көрсетіп, өте маңызды үш ұпайды еншіледі. Осы сүріністің кесірінен алматылықтар көшбасшылар жұбы — «Қайрат» пен «Шахтерді» ұзатып алды.
Қақпашының бенефисі және орталық матчтағы ымыра
ҚФФ Академиясы өз алаңында «Ертісті» 2:0 есебімен ұтты. Бірақ есеп жанкүйерлерді алдарқатпауы тиіс — ойын соңғы минуттарға дейін шиеленісті жағдайда өтті. Алаң иелерінің қақпашысы Абай Заманбек кездесудің нағыз қаһарманына айналды. Ол қақпа алдында темірдей қорғаныс тұрғызып, бір матчта бірден екі пенальтиді қайтарды және өз қақпасын голдан аман сақтап қалды.
Шымкентте өткен «Ордабасы» мен «Шахтер» арасындағы турдың орталық шайқасы тартыс жағынан үмітті ақтағанымен, жеңімпазды анықтай алмады. Қарағандылықтар жылдам гол соғып, алаң иелерін абдыратып тастады — 5-минутта-ақ Даниал Амантай оңтүстікқазақстандықтардың қақпашысын қапы қалдырды. Шымкенттіктер естерін жиып, 55-минутта есепті теңестірді. Қалған уақыт табанды әрі ымырасыз күресте өткенімен, көрермендер басқа гол көрмеді — 1:1.
Оңтүстік дербиі және Ақтаудағы тарихи жетістік
«Қайсар» мен «Тараз» арасындағы тартысты оңтүстік дербиі қызылордалықтардың 2:1 есебімен жеңісімен аяқталды. «Қайсар» құрамындағы табыстың басты авторы — өз еншісіне гол мен нәтижелі пасты жазған Ернар Парда болды.
«Қайрат» қонақта ақтаулық «Каспийді» шеберліктің арқасында сенімді түрде бетке алды — 0:3. Бұл матч QJ League тарихында мәңгі қалады. Алматылықтардың шабуылшысы Дәулет Орынбасар үлкен жас санатындағы өзінің 27-ші голын соқты. Осылайша, ол бұрынғы рекордшылар — Дастан Сәтпаев пен Глеб Макридовты артқа тастап, U18 Лигасының тарихындағы ең үздік сұрмерген атанды.
Тур қорытындысы бойынша «Қайрат» «Шахтердің» сүрінуі арқасында бірінші орынға нық жайғасты, ал «Жас Қыран» чемпиондық жарыстағы өз міндетін қиындатып алды.
