Евгений Яровенко РФММ оқушылары алдында сөз сөйледі

Еске салайық, Евгений Викторович – Қазақстан тарихындағы футболдан жалғыз Олимпиада чемпионы. Қаратау қаласының тумасы 1988 жылы Сеулде өткен Олимпиада ойындарында КСРО құрамасының маңызды ойыншыларының бірі болды. Финалда атақты Бразилия құрамасын жеңген сол команда құрамында өнер көрсетті. 2004 жылы ол УЕФА құрылғаннан бергі кезеңдегі ең үздік қазақстандық футболшы деп танылды.

Кездесу мектептің акт залында өтті. Евгений Яровенко өз мансабының қалыптасу жолы туралы – аула футболынан Олимпиада тұғырына дейінгі сапарын әңгімелеп берді. Ол оқушылармен тәжірибесімен бөлісіп, мақсатқа жету үшін нені көздеу керектігі жөнінде кеңестер айтты.

Сондай-ақ Freedom QJ League дамуы мен жетістіктеріне және қазіргі таңда Италияда өтіп жатқан қысқы ойындарда қазақстандық мәнерлеп сырғанаушы Михаил Шайдоровтың тарихи жеңісіне ерекше назар аударылды.

Кездесу соңында Олимпиада чемпионы оқушылар мен модератордың сұрақтарына жан-жақты жауап беріп, барша ниет білдірушілерге қолтаңба сессиясын өткізді.

«Мені шақырған досым Айбек Айдархановқа алғысымды білдіремін. Атмосфера өте жағымды болды, бірінші сыныптан оныншы сыныпқа дейінгі оқушылар қатысты.

Әр адамның өз арманы, өз мақсаты бар. Мен балаларға спортпен шұғылданып, көп еңбектену керектігін айттым – мейлі ол күрес, бокс, гимнастика немесе футбол болсын. Сонымен қатар білім алуды ұмытпау қажет. Спорт – салауатты өмір салты, ал бұл – ұлт денсаулығы.

Біздің Лигамыз туралы да айтып өттім – оның қандай ұйым екенін, жасөспірімдер чемпионаттарын қалай өткізетінімізді түсіндірдім. Форматы жағынан Еуропада теңдесі жоқ турнирлер ұйымдастыратынымызды айттым. Рохус Рохусович Шох, Тимур Русланович Турлов және біздің ұйымшыл ұжым туралы әңгімеледім. Балалар бәрін өз құлағымен естіп, біліп жүрсін дедім.

1988 жылғы Олимпиада финалы туралы да сұрақтар болды – бразилиялықтарды қалай жеңдік, ол қалай мүмкін болды деген. Мен бұл үлкен жауапкершілік екенін айттым, өйткені артымызда бүкіл Отанымыз, бүкіл Қазақстан, жанкүйерлер, бапкерлер, достар мен отбасылар тұрды.

Алтын медаль – тек менің ғана еңбегім емес, бұл бүкіл қазақстандық халықтың жетістігі. Менімен бірге оқып, бірге өмір сүрген жандардың, барлық жанкүйерлердің еңбегі. Бұл медаль Қазақстан спортының тарихында мәңгі қалады.

Құдай қаласа, осы балалардың арасынан да бір Олимпиада чемпионы шығады», – деді Евгений Викторович.