Үлгі ретінде: ҚПЛ-2025 тарихындағы ең жас дебютанттар мен гол соққан ойыншылар, 2-бөлім

Біз сіздердің назарларыңызға ҚПЛ-2025 клубтарының тарихындағы ең жас дебютанттар мен гол авторлары туралы тарихи шолудың екінші бөлімін ұсынамыз. Бұл рекордтар болашақта ересектер футболында дебют жасауға дайындалып жүрген жас ойыншылар үшін лайықты мотивация болады деп үміттенеміз.

«Қайсар»

Ең жас дебютант: Әсет Менлихожа, 17 жас, 1 ай, 13 күн

Ең жас гол авторы: Алдан Балтаев, 17 жас, 8 ай, 9 күн

Әсет Менлихожа Қызылордалық клуб тарихындағы ең жас ойыншы атанды, ол 2006 жылғы Қазақстан Кубогының «Шығысқа» қарсы матчында негізгі құрамда алаңға шықты. Негізгі уақыт 3:3 есебімен аяқталғаннан кейін ойын пенальти сериясына ұласты, онда «Қайсар» аз ғана айырмашылықпен жеңіліп қалды.

Ойыншы мансабын аяқтағаннан кейін Әсет Болатұлы футболдағы жұмысын жалғастырды – ол Freedom QJ League дебюттік маусымында «Қайсар» U-18 командасының бас бапкерінің ассистенті болды.

Дәл сол матчта, Әсет Менлихожа дебют жасаған кездесуде, Алдан Балтаев та алғаш рет «Қайсардың» негізгі командасы сапында алаңға шықты – бірақ ол Әсеттен екі айға үлкен. Дегенмен, сол жылдың қыркүйегінде ол голмен ерекшелене алды. ҚПЛ-дың Қостанайда өткен «Тобылға» қарсы матчында 63-минутта ойынға қосылған Алдан 72-минутта қарсылас қақпасын дәл көздеп, «абырой голының» авторы атанды – қызылордалықтар бұл ойында 1:5 есебімен жеңіліп қалды.

«Қызылжар»

Ең жас дебютант: Тимур Мульдинов, 16 жас, 7 ай

Ең жас гол авторы: Сергей Скорых, 17 жас, 4 ай, 19 күн

«Қызылжар» академиясының түлегі, қазіргі кезде де Петропавлдық клубтың намысын қорғап жүрген Тимур Мульдинов негізгі команда сапындағы дебютін 2010 жылы жасады – ол Қазақстан Кубогының «Жітіқараның» «Асбестіне» қарсы матчында 85-минутта алаңға шықты.

Гол соғу жөніндегі рекордқа Сергей Скорых ие, және бұл көрсеткішке шамамен ширек ғасыр болды. Ол ҚПЛ-2001 маусымында «Қайсарға» қарсы матчтың екінші таймында алаңға шығып, 88-минутта өз командасының басымдығын еселеді – ойын 2:0 есебімен аяқталды.

«Оқжетпес»

Ең жас дебютант: Захар Порох, 16 жас, 2 ай, 25 күн

Ең жас гол авторы: Захар Порох, 16 жас, 4 ай, 11 күн

Көкшетау клубының тарихындағы ең жас ойыншы және голеадор – Freedom QJ League 2023 қатысушысы Захар Порох. Ол Лигада «Оңтүстік» командасы сапында бес матч өткізген.

Ол 2024 жылғы наурызда «Оқжетпес» сапында дебют жасады – Қазақстан Кубогының Алматының AKAS командасына қарсы матчында алаңға шықты. Ал сәуір айында, Бірінші лиганың 4-турында, Захар алаңға шығып, SD Family қақпасына өз командасының бір голын соқты.

«Ордабасы»

Ең жас дебютант: Евгений Левин, 16 жас, 9 ай, 7 күн

Ең жас гол авторы: Қайрат Әшірбеков, 17 жас, 10 ай, 25 күн

Евгений Левин Шымкент клубы сапындағы алғашқы матчын 2009 жылдың сәуірінде өткізді – ол ҚПЛ-дың 6-турында Қызылордада өткен «Қайсарға» қарсы ойында 72-минутта алаңға шықты.

«Ордабасы» тарихындағы ең жас гол соққан ойыншының рекордына биыл ширек ғасыр толады. 17 жастағы Қайрат Әшірбеков өз голдарын 2000 жылдың қыркүйегінде, сол кездегі «Достық» сапында бастап, өз алаңында Көкшетаудың «Ақмола» командасының қақпасын дәл көздеді (ол қазіргі «Оқжетпес» атауымен белгілі). Осы голының арқасында ол командасын ҚПЛ-ның 26-турында жеңілістен құтқарып қалды – ойын 1:1 есебімен аяқталды.

Дәл сол жылы жас жартылай қорғаушы тағы бір гол соғып, клубтан кетеді. Ол «Тараз» сапында өнер көрсетіп, кейін «Ақтөбе» клубының аңыз ойыншыларының біріне айналады. Ал 2010 жылы Қайрат Әшірбеков туған клубына қайта оралып, онда ойыншылық мансабындағы соңғы сегіз жылын өткізеді.

«Тобыл»

Ең жас дебютант: Аманжол Бақытжанов, 16 жас, 3 ай, 20 күн

Ең жас гол авторы: Нұралы Жақсылық, 17 жас, 8 ай, 5 күн

Аманжол Бақытжанов Freedom QJ League-2024 маусымында «Тобыл» U-18 сапында 6 матч өткізіп, екі нәтижелі паспен көзге түсті. Осы маусымда ол негізгі команда сапында да дебют жасап, Қазақстан Кубогында Қостанайлықтар үшін жеңісті болған «Қайсарға» қарсы ойында алаңға шықты. Дегенмен, ол тек 88-минутта ойынға қосылды.

Нұралы Жақсылық та өзінің алғашқы голын негізгі құрам сапында Қазақстан Кубогында соқты – бірақ бұл 2022 жылы болған еді. Сол кездесуде «Тараз» «Тобылды» 6:1 есебімен ойсырата жеңген болатын, алайда Қостанайлық клуб үшін абырой голын дәл осы Жақсылық соғып, командасының жалғыз нәтижелі соққысының авторы атанды.

«Тұран»

Ең жас дебютант: Тенизбай Абдурахманов, 18 жас, 3 ай, 14 күн

Ең жас гол авторы: Лука Згурский, 19 жас, 2 ай, 25 күн

«Тұран» клубының бұл екі рекорды жақын арада жаңаруы әбден мүмкін – өйткені қазіргі рекорд иелері өздерінің жұлдызды сәтінде кәмелеттік жасқа толған еді. Тенизбай Абдурахманов 2020 жылғы Бірінші лиганың 8-турында, «Алтайға» қарсы өткен өз алаңындағы матчта 72-минутта ойынға қосылды.

Ал Лука Згурский туралы айтсақ, ол Мәскеудің ЦСКА клубының түлегі ретінде биылғы маусымда-ақ «Тұран» тарихына өз атын жазды – ҚПЛ-ның алғашқы турында «Оқжетпеске» қарсы матчта гол соқты. Оған дейін бұл рекорд екі жыл бойы Зикрилло Сұлтаниязовқа тиесілі болды, алайда оның дебют жасаған кездегі жасы үш айға кіші еді.

«Ұлытау»

Ең жас дебютант: Эмин Мусаев, 17 жас, 4 ай, 10 күн

Ең жас гол авторы: Ерасыл Сәрсенбай, 18 жас, 2 ай, 11 күн

«Ұлытау» – әлі өте жас клуб, өйткені ол 2022 жылы құрылған. Сондықтан екі рекордтың да өткен жылы орнатылуы таңқаларлық емес. Жезқазғандық команда сапында алаңға шыққан ең жас ойыншы – Эмин Мусаев. Ол Қазақстан Кубогының SD Family-ге қарсы матчында 67-минутта ойынға қосылды.

Дебютінен бір жыл бұрын Эмин Мусаев Freedom QJ League-да «Жас Қыран» сапында өнер көрсетті. Ол 22 матчта 8 гол соғып, 3 нәтижелі пас берді. Оның «Шахтерға» соққан голы Лиганың алғашқы маусымындағы 21-турдың үздік голы болып танылды.

«Ұлытау» тарихындағы ең жас гол авторы – тағы бір Freedom QJ League түлегі Ерасыл Сәрсенбай. 2023 жылғы маусымда ол «Оңтүстік» сапында 17 матч өткізіп, 11 гол соғып, 4 нәтижелі пас берді. Жезқазғандық клубқа ауысқаннан кейін, 2024 жылғы Бірінші лиганың 19-турында, «Ақтөбе-М» командасын ойсырата жеңуіне үлес қосты. Ол 82-минутта алаңға шығып, 89-минутта гол соқты.

Үлгі ретінде: КПЛ-2025 тарихындағы ең жас дебютанттар мен гол соққан ойыншылар, 1-бөлім