Fantasy QJ League: «Қайратпен» тең ойын үшін ең көп ұпай жинаған «Каспий» ойыншысы кім?

Ақтаулық команданың кейбір ойыншылары маусымдағы ең үздік ойынын көрсетуі мүмкін – бұл олардың Fantasy QJ League көрсеткіштеріне де әсер етті. Өткен турда ең көп ұпай жинаған «Каспий» футболшыларының топтамасын ұсынамыз.

Әбілқайыр Жармұхамет – 10 ұпай

«Каспий» шабуылшысы «сары-қаралармен» өткен кездесудің нағыз қаһарманына айналды – дәл оның жылдам дублі ақтаулық команданың сенсация жасауының басты себебі болды. Ол алаңда толық 90 минут өткізді және қос голдан бөлек, допты жеті рет іліп әкетіп, қайтарып алды. Бұған дейін Әбілқайыр үшін ең сәтті өткен ойындар «Астана» және осы «Қайратқа» қарсы Алматыда өткен матчтар болатын – ол сол кездесулерде бір-бір голдан соққан еді.

Жармұхамет ұпайын одан да арттыра алар еді, бірақ сары қағаз үшін бір ұпайдан айырылды. Жалпы, Ақтауда өткен кездесу өте эмоцияға толы болды – «Каспийдің» жеті бірдей ойыншысы дөрекі ойын немесе спортқа жат қылықтары үшін ескерту алды.

Ален Ташенов – 6 ұпай

Ташенов алаңда тек бір тайм ғана өткізгеніне қарамастан, командасына айтарлықтай пайда әкеліп үлгерді – ол Жармұхаметке нәтижелі пас шығарып, дубль жасауына көмектесті. Сонымен қатар, оның еншісінде 11 рет допты іліп әкету және қайтарып алу көрсеткіші бар.

Осының бәрі Аленге фэнтези-турнирдегі өзіндегі ең үздік нәтижесін қайталауға мүмкіндік берді – қызығы, бұған дейін ол алты ұпайды «Қайратпен» сырт алаңдағы ойында (2:4) жинаған болатын.

Арын Қанат пен Ернұр Түркменбай – 4 ұпай

Бұл ойыншылар ұпайларын белсенді қорғаныстағы әрекеттері арқылы жинады. Екеуі бірігіп 30-дан астам допты іліп әкету және қайтарып алу әрекетін жасады – Арынның еншісінде 15, Ернұрдың үлесінде 16 көрсеткіш бар. Дегенмен, олардың әрқайсысы бес ұпайға жетуі мүмкін еді: Арын қорғаушы ретінде екі гол жібергені үшін айып ұпайын алды, ал жартылай қорғаушы Ернұр сары қағазбен жазаланды.

Еске салайық, Қостанайда өтетін «Тобыл» мен «Жас Қыран» арасындағы матчтың кейінге шегерілуіне байланысты, бұл ойын үшін ұпайлар тек 26 тамызда есептеледі. Сол күні 12-турдың жеңімпазы да жарияланатын болады.

Әр демалыс күнінің қорытындысы бойынша ең үздік құрамды жинаған қатысушылар COPA.KZ ұсынған 20 000 теңге көлеміндегі сертификатқа ие болады. Fantasy QJ League өз командаңызды төмендегі сілтеме арқылы жинаңыз!