Freedom QJ League мен City Football Group Қазақстандағы балалар және жасөспірімдер футболын дамыту үшін ынтымақтастық туралы келісімге қол қойды

Freedom QJ League – еліміздің түкпір-түкпіріндегі кәсіби клубтар мен академиялардың командаларын біріктіретін Қазақстандағы жасөспірімдер футболы біріншіліктерінің жетекші жүйесі. 2023 жылы бастау алған лига ойыншыларға, жаттықтырушылар мен техникалық қызметкерлерге жоғары нәтижеге бағытталған орта қалыптастырып, футболшылардың дамуына ерекше көңіл бөледі. U-18 жоғары дивизионының жеңімпазы Қазақстан атынан УЕФА Жастар лигасына қатысу құқығына ие болады.

2013 жылы құрылған City Football Group – төрт құрлықтағы 12 клубты біріктіретін ғаламдық футбол ұйымы. Халықаралық желісіне сүйене отырып, CFG футбол жұмысын ұйымдастыруда, ойыншыларды дамытуда, жаттықтырушылық істе, спорттық нәтижелерде, инфрақұрылым мен клубтарды басқаруда жоғары стандарттарды ұстанады, сондай-ақ өз клубтары мен серіктестері арасында тәжірибе мен үздік әдістердің алмасуына жол ашады.

Бұл серіктестік ұзақмерзімді ынтымақтастық пен тәжірибе алмасу арқылы Қазақстандағы жасөспірімдер футболын нығайтуға деген ортақ ұмтылыстың көрінісі. Басты назар жаттықтырушылық жұмысқа, техникалық басшылық пен академиялардың жұмысын ұйымдастыруға, дене дайындығына, спорт медицинасына, ойыншыларды дамыту мен скаутингке аударылады.

Ынтымақтастық аясында академияларды бағалау, техникалық семинарлар өткізу, CFG футбол әдістемелерімен бөлісу, қазақстандық мамандарға City Football Group желісінде кәсіби тұрғыда өсуге мүмкіндік беру және бірлескен футбол бастамаларын жүзеге асыру көзделген.

Freedom QJ League президенті Рохус Шох: «Freedom QJ League алғашқы күннен-ақ жас футболшылардың ғана емес, мамандардың да дамуына көмектесетін жүйелі жоба ретінде құрылды. Сондықтан бағдарламаның жеке бір бөлігі қазақстандық клубтардың жаттықтырушылары мен қызметкерлерімен жұмысқа арналады.

Әлемдегі ең ірі футбол құрылымдарының өкілдерімен тікелей тілдесіп, оларға сұрақ қою мүмкіндігі – бүгінгі қазақстандық футболға дәл қажет кәсіби тәжірибе алмасу».

City Football Group футбол бизнесі жөніндегі ғаламдық директоры Клайв Ривз: «Freedom QJ League-пен серіктестікті бастап, Қазақстандағы жасөспірімдер футболының дамуына үлес қосу үшін клубтар мен академиялардан тұратын ғаламдық желімізде жинақталған тәжірибемізбен бөлісетінімізге қуаныштымыз. City Football Group-та ойыншыны табысты дамытудың іргетасы – мықты жаттықтырушылық жұмыс, нақты әдістеме және ұзақмерзімді міндеттемелер екенін жақсы білеміз.

Бұл ынтымақтастық қаланған берік іргетасқа сүйеніп, білім алмасуға, үздік тәжірибені енгізуге және жаттықтырушылар, техникалық қызметкерлер мен жас ойыншылардың өсуіне жағдай жасауға бағытталған. Freedom QJ League-пен тығыз жұмыс істеуді асыға күтеміз әрі Лиганың жас футболшыларды даярлау жүйесін нығайту жолындағы ұмтылысын қолдап, Қазақстан футболының болашағына ұзақмерзімді үлес қосуға дайынбыз».

City Football Group осы айдың өзінде Қазақстанға кеңес беру сапарларының сериясын бастайды. Олардың аясында мамандар академиялардың инфрақұрылымын, жаттығу бағдарламаларын және ойыншыларды дамыту жағдайларын бағалау үшін еліміздің түкпір-түкпіріндегі футбол орталықтарын аралап шығады.