Лиганың спорттық-аналитикалық бөлімі маусымалды жұмысын қатысушы командалардың жаттықтырушыларымен жалғастыруда. «Клубтарды әдістемелік қолдау» жобасы аясында семинарлар сериясы басталды.
Еске салайық, жаңа маусымда турнирлер саны үштен бесеуге дейін көбейеді. Бұл командалар санының (32-ден 54-ке дейін) және, сәйкесінше, жаттықтырушылардың артуын білдіреді – жас футболшылармен 130-дан астам маман жұмыс істейтін болады.
Жаттықтырушылардың жарысқа дайындығын барынша тиімді ету мақсатында оқу топтарын үш аймаққа бөлу туралы шешім қабылданды – олар Астана, Шымкент және Алматы.
Үш күндік семинарлар сериясының біріншісі Қазақстанның астанасында 4 сәуір, бейсенбі күні басталды. Оған «Астана», «Ертіс», «Шахтер», «Тобыл», «Жеңіс» және «Қызылжар» футбол орталықтарының жаттықтырушылары қатысуда.
Қатысушылар алдында спорттық-сараптамалық бөлімнің жетекшісі Арсен Инкарбеков сөз сөйледі. Ол алдағы маусымға арналған жоспарлар мен енгізілген жаңалықтар туралы айтып берді.
Лиганың сарапшы-талдаушысы Евгений Яровенко өткен маусым қорытындысы бойынша жасалған аналитикалық есепті таныстырды. Есеп өз қақпасынан шабуылды құру мен дамыту тиімділігіне арналды. Анықталған мәселелер бірлесіп талқыланып, оларды шешудің түрлі жолдары ұсынылды. Одан кейін сарапшы-талдаушы Жанна Мальгаждарова осы мәселеге байланысты САБ әзірлеген ұсыныстардың бірін таныстырды.
Бірінші күнгі мамандарға арналған практикалық тапсырма – жаттығу сабағының жоспарын жасау болды. Олар FF Manager цифрлық платформасы арқылы конспект құрастыруы тиіс еді.
Екінші күні жаттықтырушылар өздерінің жоспар-конспектілерін таныстырып, Футбол үйінде жаттығу өткізді. Жаттығу футбол орталықтарының үйлестірушілерінің қадағалауымен өтті – еске салайық, мұндай лауазым Лига тарапынан биыл енгізілген.
«Өткен маусым қорытындысы бойынша кері байланыс жинау барысында САБ-қа жаттығуларды футбол алаңында көбірек өткізу туралы ұсыныс келіп түсті. Осыған байланысты маусым алдындағы оқу-жаттығу кезеңінің үш күнінің бірін тәжірибеге арнау туралы шешім қабылданды.
Қатысушылар төрт микротопқа бөлінді. Бір топ жаттығу өткізіп жатқан кезде, қалған үш топ САБ сарапшыларымен бірге интерактивті талдау жүргізді. Барлық жаттығулар BigBro жобасының «ақылды» камерасы мен дрон арқылы жазылып отырды.
Түсірілген бейнематериалды қатысушылар өткен жаттығуды өз бетінше талдау үшін қолданатын болады», – деді Лиганың сарапшы-талдаушысы Игорь Шпанера.
Семинардың соңғы, үшінші күнінде әрбір микротоп өз жаттығуына жасаған талдауын ұсынып, осы бағыттағы одан әрі жетілдіру жоспарын әзірлейді.
