Freedom QJ League B төртінші турының матчтары қалай өткенін баяндаймыз.
«Атыраудың» камбэгі
«Мұнайшылар» маусымдағы екінші жеңісіне қол жеткізді – бұл жолы «Оқжетпесті» ұтты. Алайда бұл үш ұпай оларға оңай келген жоқ.
Атырауда есепті дәл «синегорлықтар» ашты – 10-минутта қонақтар пенальти орындау құқығына ие болып, оны Бекдар Сайлауов сәтті жүзеге асырды. Бірінші таймның соңына таман «Оқжетпес» басымдығын еселей түсті – Арсен Арапов Абильмансұр Хамиттің пасынан кейін гол соқты.
Алайда үзілістен кейін көкшетаулық командада үлкен мәселе туындады – 51-минутта Петр Попадюк қызыл қағаз алды.
Осыдан кейін «Атырау» жылдам есепті қысқартуға кірісті. «Оқжетпес» ойыншысы алаңнан қуылған сәтте қонақтар екі доп айырмасымен алда тұрған еді, ал 11 минуттан кейін басымдық алаң иелеріне өтті – 3:2. Нұрсұлтан Жомарт, Нұрбек Амангелді және Альберт Сидихов көзге түсті. Ярослав Бортник екі нәтижелі пас берді – бұл оған 4-турдан кейін үш ассистпен үздік ассистенттер көшін бастауға мүмкіндік берді.
Матчтағы соңғы нүктені Ералы Камысбай қойды – ол 79-минутта «Оқжетпес» қақпасына төртінші голды соқты. Турнирлік кестедегі жағдай теңесті – орта тұста орналасқан бірден төрт команданың еншісінде алты ұпайдан бар.
«Елімайдың» өкінішті жеңілісі
Семейдегі ойын біршама күтпеген нәтижемен аяқталды. «Елімай» мен «Жетісу» ұзақ уақыт бойы гол соға алмады, алаң иелері тек 72-минутта есеп ашты – Анас Адылханов көзге түсті.
Осыдан кейін көпшілік «Елімай» минималды жеңіске жақын деп ойлады, себебі ойынның аяқталуына көп уақыт қалмаған еді. Алайда бірнеше минуттан кейін Александр Селинкиннің қателігі «Жетісуды» ойынға қайта қосты, ал қосымша уақытта жетісулық қорғаушы Тамерлан Қайратдин стандарттан әдемі соққы жасап, өз командасына жеңіс сыйлады.
«Жайық» қарсыласынан басым түсті
Оралда чемпионаттың екі көшбасшысы – «Жайық» пен «Жеңіс» арасындағы кездесу алаң иелерінің жеңісімен аяқталды. Дамир Залмуканов пен Супьян Хасанов елордалық команданың қақпасын бір-бір реттен дәл көздеді, ал қонақтар жауап қайтара алмады.
Енді турнирлік кестеде ұпай жоғалтпаған жалғыз команда қалды. Сонымен қатар алматылық «Хан-Тәңірінің» жеңісінен кейін «Жеңіс» үшінші орынға түсті.
Айта кетейік, астаналықтар әлі де қорғанысы ең тиімді командалардың бірі болып отыр – «Жайық» соққан екі гол «Жеңіс» үшін осы маусымдағы алғашқы жіберілген голдар болды.
«Хан-Тәңірі» «Қызылжарды» ірі есеппен жеңді
Алматылықтар бұл турда еш қиындық көрген жоқ – «Қызылжарға» қарсы өз алаңындағы матч 6:0 есебімен аяқталды. Рауан Сәрсенбек дубль жасады, Жұмабек Жанәді «гол+пас» жүйесі бойынша 1+1 көрсеткішін тіркеді, ал Тимур Дешко мен Әділжан Қайрат бір-бір голдан соқты.
«Хан-Тәңірі» қатарынан үш жеңіске жетті. Алматылықтарды жеңген жалғыз команда әзірге «Жайық» болып тұр.
Шымкенттегі бес гол
«Оңтүстік» пен «Алтай» арасындағы ойын өте тартысты өтті.
10-минутта шымкенттік команданың хавбегі Әлзаир Раис есеп ашты, ал бірінші таймның қалған бөлігі алаң иелерінің минималды басымдығымен өтті. Дегенмен екінші таймның басында Дәулет Дәутбаев есепті теңестірді.
1:1 есебі 74-минутқа дейін сақталды. Дәл сол сәтте «Оңтүстік» 11 метрлік айып добын орындау құқығына ие болып, Рауан Джурумбетов мүмкіндігін мүлт жіберген жоқ.
Көрермендердің қуанышына қарай, қосымша уақытта бірден екі гол соғылды. Алдымен Арда Мұхтаров оңтүстіктік команданың басымдығын арттырды, кейін Владислав Гордийчук Дәулет Дәутбаевтың пасынан соң есеп айырмасын қайта қысқартты. Қорытынды есеп – 3:2, «Оңтүстіктің» пайдасына.
Осылайша «Алтай» еншісінде ұпайы жоқ жалғыз команда болып қалды – Павел Евтеев шәкірттері жеңіліс сериясын төрт матчқа дейін созды.
4-турдан кейінгі үздік сұрмерген: Тимур Дешко («Хан-Тәңірі», 4 гол).
4-турдан кейінгі үздік ассистент: Ярослав Бортник («Атырау», 3 ассист).
.webp)