Freedom QJ League қайта оралады: флагман турнирдің 1-туры алдындағы шолу

«Шахтер» – «Тараз»

Өткен маусымда 2009 жылы туған футболшылардан жасақталған «Шахтер» құрамасы Freedom QJ League-тің қола жүлдесін иеленсе, «Тараз» тек сегізінші орынмен шектелген еді. Қарағанда фаворит айқын сияқты, алайда өзара кездесулерге үңілсек, көрініс біршама күрделене түседі: оңтүстік ұжымы өз алаңында жеңіске жеткен, бірақ кейін Қарағандыда ірі есеппен жеңілген.

Сондай-ақ «кеншілердің» өтінімінде өткен маусымдағы флагман турнирде өзін жарқын қырынан көрсеткен бірқатар «джокерлер» бар екенін атап өткен жөн. Олардың қатарында QJL All Star матчының қатысушылары Нұрхан Қағазбаев, Илья Гезик және өткен маусымда «Астана» сапында үздік жартылай қорғаушы атанған Даниял Назаров бар. Бұдан бөлек, турдың үздік голы үшін бірнеше рет марапатқа ие болған Мирас Қуатты да атап өту керек.

ҚФФ Академиясы – «Жас Қыран»

Өткен маусымда Freedom QJ League B турнирінде екінші орын алған Лига А дебютанттарына былтыр U-17 турнирін төртінші орынмен аяқтаған «Жас Қыран» тәрбиеленушілері қарсы тұрмақ.

«Жас Қыран» өз өтінімінде үш «джокерін» сақтап қалды: қақпашы Рамазан Байрамов, жартылай қорғаушы Рамзес Рашидов және шабуылшы Бекжан Хафизов. Ал ҚФФ Академиясының ростерінде 2009 жылы туған бірде-бір футболшы жоқ – биыл ойыншылардың басым бөлігі небәрі 16 жасқа толады.

ҚФФ Академиясы ойыншыларының ішінде Ануар Толендиді ерекше атап өткен жөн. Қыста ғана 15 жасқа толған шабуылшы Freedom QJ League B турнирінің 8 матчында 7 гол соқты, алайда маусым соңын үш матчтық голсыз сериямен аяқтады. Ол алғашқы турда тосынсый жасай ала ма?

«Қайсар» – «Тобыл»

Дәл осы кездесу алғашқы турдың орталық матчы болмақ. Себебі Қызылордадағы ойын Freedom QJ League тарихындағы мыңыншы матчқа айналады.

Екі команда да өткен U-17 маусымында аутсайдерлер қатарында болды, бірақ өзара кездесулерде басымдық анық Қостанай ұжымының жағында: «Тобыл» үйде де, түзде де жеңіске жеткен.

«Қайсар» жаңа маусымды жаңа стадионда өз жанкүйерлері алдында жеңіспен бастауды анық қалайды. Лиганың мерейтойлық матчы аясындағы футбол мерекесінің атмосферасы да «қасқырларға» осы мақсатқа жетуге көмектесуі мүмкін.

«Ордабасы» – «Ақтөбе»

Өткен жылы шымкенттік команда U-17 турнирінің күміс жүлдесін сенімді түрде иеленді, соның ішінде маусым чемпионы «Қайратқа» жалғыз жеңілісін де тарту еткен болатын. «Ақтөбе» бесінші орынмен аяқтады, алайда бір турда «қызыл-ақтар» «Ордабасыға» қиындық тудыра алды – 15-турдағы кездесу голсыз тең аяқталған. Бірақ ол ойын Ақтөбеде өтті, ал өз алаңында оңтүстіктің командасы қарсыласын ірі есеппен жеңді. Бұл жолы қалай болады?

Қызығы, «Ақтөбе» өтініміндегі барлық «джокерлер» – жартылай қорғаушылар. Олардың қатарында QJL All Star матчының қатысушысы Азамат Мусаев та бар. Тәжірибелі ортаңғы шеп «қызыл-ақтарға» маусымды оң нәтижемен бастауға көмектесе ме, оны жақын арада білеміз.

«Каспий» – «Астана»

Ақтауда өткен Freedom QJ League U-17 маусымында сәтсіздеу өнер көрсеткен екі команда кездеседі: «Астана» тоғызыншы орын алды, ал «Каспий» турнирді соңынан бір саты жоғары аяқтады.

Өзара кездесулер статистикасы «Астананың» басымдығын көрсетеді. Алайда бір жыл бұрын елордалық команда Ақтаудан небәрі минималды жеңіспен кеткен, ал жалғыз гол пенальтиден соғылған еді. Сондықтан алдағы матчтың нәтижесі қандай боларын болжау қиын.

«Қайрат» – «Ертіс»

Freedom QJ League U-17 чемпионы жаңа маусымды өз алаңындағы «Ертіспен» матчпен бастайды. Бұл – жексенбі күні өтетін флагман турнирдің жалғыз ойыны. Еске салайық, павлодарлықтар өткен маусымды алтыншы орында аяқтап, «Қайраттан» екі рет те ірі есеппен жеңілген.

«Ертіс» өтініміндегі «джокерлердің» ішінде, сөзсіз, Руслан Рахметовті ерекше атау керек. QJL All Star матчының қатысушысы флагман турнирдің 18 турында «гол+пас» жүйесі бойынша 11+3 көрсеткішін тіркеген. Алайда 17 жастағы Руслан Қазақстан Премьер-лигасында павлодарлықтардың негізгі командасына да шақырту алып жүр, сондықтан оның осы маусымдағы Лигадағы рөлі мен белсенділігі әзірге сұрақ күйінде қалып отыр.

Осыған ұқсас жағдай «Қайрат» шабуылшысы Абылай Төлеуханға да қатысты. Өткен маусымның үздік шабуылшысы сәуір айында-ақ «Шахтерге» қарсы Бірінші лига матчында алаңға шыққан болатын.

Fantasy QJ League: ең тиімді құрамды жинап үлгеріңіз!