Freedom QJ League U-17, U-16, U-15: 1-турдың басты сюжеттері

«Атлетико» академиясының әркелкі бастауы

Freedom QJ League-тің дебютанттары – Қазақстандағы «Атлетико Мадрид» академиясының тәрбиеленушілері – жарысты Алматыда «Жас Қыран» командаларына қарсы матчтармен бастады.

Еске салсақ, мадридтік клубтың қазақстандық академиясы Лиганың А санатындағы биылғы маусымда тек U-15 және U-16 турнирлерінде ғана өнер көрсетеді. Қалған екі санатта оның орнын ҚФФ академиясы иеленеді.

Егер «Атлетиконың» жасы үлкендеу командасы алаң иелерін 3:2 есебімен әрең жеңсе, U-15 санатында ірі есеп тіркелді – «Жас Қыран» бес гол соғып, өз қақпасына бірде-бір доп жіберген жоқ.

«Тобыл» Қызылордадағы жеңілістердің есесін қайтарды

«Қайсар» Қостанайдан келген қонақтарды екі рет жеңе алды – әуелі U-17 турнирінде, кейін флагмандық жарыста да басым түсті. Алайда кіші жастағы командалар «Тобыл Аренада» кездесті, және онда алаң иелері өз артықшылықтарын сәтті пайдаланды.

2012 жылы туған «Тобылдың» жасөспірімдері қызылордалық құрдастарын 7:0 есебімен тас-талқан етті, ал U-16 командасы қарсыластарының қақпасына жауапсыз бес доп соқты. Соңғы матчта жас шабуылшы Балахмет Әділбек покер авторы атанды.

Сарсымбаевтың жарқын перформансы

Әділбек – алғашқы турдың өзінде покер жасаған жалғыз ойыншы емес. Тамерлан Сарсымбаев U-17 турнирінде «Қайратқа» «Ертісті» ірі есеппен жеңуге көмектесті: ол ойыннан үш гол соғып, бір пенальтиді дәл орындады. Бұған қоса, оның пасынан Рамазан Серікқұл мергендік танытты.

Еске салсақ, келесі аптаға жетпей 16 жасқа толатын Тамерлан өткен маусымда бірден «Қайраттың» екі командасында – U-16 және U-17 сапында ойнады. Сәйкесінше, ол екі турнирдің де чемпионы атанды.

Тектілік сабақтастығы

Лигада бірден екі жас ойыншы дебют жасады, олардың туыстары қазақстандық футбол жанкүйерлеріне жақсы таныс. Олар – «Ақтөбе» U-15 командасының 13 жастағы жартылай қорғаушысы Санжар Байдәулетов пен «Астана» U-16 командасының 14 жастағы шабуылшысы Даниэль Тлешев.

Біріншісі – QJ League-тің алғашқы маусымында ойнаған, ал қазір «қызыл-ақтардың» негізгі командасы сапында көптеген матч өткізген Аян Байдәулетовтің інісі.

Ал Даниэль – кәсіби мансабында 149 гол соққан қазақстандық футбол аңызы Мұрат Тлешевтің ұлы.