Freedom QJ League U-17, U-16, U-15: 18-тур қалай өтті?

Freedom QJ League U-17

«Шахтер» чемпиондыққа жақын!

U-17 турниріндегі басты сенсация Шымкентте тіркелді. «Қайрат» «Ордабасы» қақпасына гол соға алмай, маңызды екі ұпайдан айырылды.

Ал көш бастап келе жатқан «Шахтер» өз мүмкіндігін мүлт жібермеді – Қызылордада «Қайсарды» 4:0 есебімен ойсырата жеңіп, «Қайраттан» басымдығын бес ұпайға дейін арттырды. Дегенмен «сары-қаралардың» қоржынында «Қайсарға» қарсы кейінге шегерілген ойыны бар, ал соңғы турдың алдындағы турда алтынға таласып жатқан екі команда өзара кездеседі. Сондықтан чемпиондық интрига әлі де сақталып тұр.

Нұрланов пен Бақтыбаев «Астанаға» мүмкіндік қалдырмады

37 ұпай жинаған «Ордабасы» үшінші орнын сақтап қалды, алайда шымкенттіктердің жүлдеге деген мүмкіндігіне «Ақтөбе» (35) елеулі қауіп төндіріп тұр.

Өткен турда «қызыл-ақтар» «Астананы» 6:0 есебімен ойсырата жеңді – бұл кездесуде Ахмет Бақтыбаев хет-трик жасаса, Мирас Нұрланов «гол+пас» жүйесі бойынша 2+2 көрсеткішімен ерекше көзге түсті.

Қола жүлде үшін күресті «Жас Қыран» да жалғастырып келеді – «Каспийді» 3:0 есебімен жеңген алматылықтар «Ордабасыдан» төрт ұпайға қалып тұр.

Freedom QJ League U-16

«Қайрат» соңғы сәттерде жеңісті жұлып алды

Ересек команданың сәтсіздігі «Қайраттың» U-16 құрамасының да басынан өтуі мүмкін еді – «Ордабасыға» қарсы матчтың негізгі уақыты аяқталғанға дейін Тимур Сегізбаев атындағы стадион таблосында 0:0 есебі тұрды. Алайда қосылған минуттарда алматылықтар бірден екі гол соқты – алдымен Бекнұр Құрман мергендігімен көзге түссе, кейін Қайсар Ануарбек матчтағы интриганы толық жойды.

Екінші орында келе жатқан «Шахтер» бұл турда «Қайсарды» 7:2 есебімен ойсырата жеңді. Дегенмен «кеншілер» әлі де «Қайраттан» бес ұпайға қалып келеді, оның үстіне алматылықтардың бір ойыны бар.

«Атлетиконың» камбэгі

Тараздағы кездесу де ерекше атап өтуге тұрарлық. Бірінші таймнан кейін алаң иелері «Атлетиконы» үш доп айырмасымен жеңіп жатқан еді, алайда үзілістен кейін қонақтар осындай ірі есептен қайтып қана қоймай, матчты өз пайдасына аяқтады.

Алдымен Арлан Қайырбаевтың жылдам дублі «Тараздың» басымдығын бір голға дейін қысқартты. Кейін Мирон Ищенко есепті теңестірді.

Оңтүстік жанкүйерлері тең нәтижеге бой үйрете бастаған сәтте, матчтың соңы тағы бір тосынсый сыйлады: Расул Самаев пен Нұрасыл Айдостың голдары «Атлетикоға» 5:3 есебімен жеңіс әкелді.

Енді Ануар Жағыппардың командасы қола жүлде үшін белсенді күресті жалғастырып келеді және үшінші орында тұрған «Ақтөбеден» небәрі екі ұпайға қалып тұр. Ал 7 ұпайы бар «Тараз» турнир кестесінің соңғы алдындағы орнында қалды.

Freedom QJ League U-15

Алты матчтың төртеуі тартысты тең есеппен аяқталды

Ең кіші жас санатындағы тур күтпеген нәтижелерге толы болды. Бірден сегіз команда ұпай бөлісті: «Каспий» мен «Жас Қыран» (2:2), «Тараз» бен «Атлетико» (3:3), «Ертіс» пен «Тобыл» (2:2), сондай-ақ «Астана» мен «Ақтөбе» (2:2) тең түсті.

«Қайрат» – мерзімінен бұрын чемпион!

Қалған екі матч ірі есеппен аяқталды – «Шахтер» «Қайсарды» 4:0 есебімен сенімді жеңсе, «Қайрат» «Ордабасыға» еш мүмкіндік қалдырмады – 5:1.

Осылайша «сары-қаралардың» ең жас командасы 52 ұпай жинап, маусымның аяқталуына төрт тур қалғанда ең жақын қуғыншысы – «Тобыл» (37) үшін математикалық тұрғыда қолжетпес межеге жетті. «Қайрат»-2012 командасының мерзімінен бұрынғы чемпиондығы биылғы маусымдағы алғашқы чемпиондық болды.

Ал қалған жүлделер үшін күрес әлі де өте тартысты – маусымның аяқталуына төрт тур қалғанда кестедегі алтыншы команда үшінші орыннан небәрі үш ұпайға қалып тұр.

18-турдан кейінгі үздік сұрмергендер
Freedom QJ League U-17: Арсен Байжанов («Ақтөбе») және Тимур Тугамбеков («Жас Қыран», 12 голдан);
Freedom QJ League U-16: Мирон Ищенко («Атлетико») және Балахмет Адилбек («Тобыл», 16 голдан);
Freedom QJ League U-15: Абылай Турсын («Қайрат», 24 гол).

18-турдан кейінгі үздік ассистенттер
Freedom QJ League U-17: Темирлан Абжапар («Қайрат», 9 нәтижелі пас);
Freedom QJ League U-16: Алихан Карим («Шахтер», 10 нәтижелі пас);
Freedom QJ League U-15: Абдурахим Онгарбек («Қайрат», 17 нәтижелі пас).