Бір чемпиондық атақ – үш үміткер: Freedom QJ League B 16-турының қорытындысы

«Хан-Тәңірі» бірінші орынды қайтарып алды

Турдың орталық матчы Алматыда өтті. Онда көшбасшылар үштігіне кіретін екі команда кездесті. «Хан-Тәңірі» «Жеңісті» 3:1 есебімен жеңіп, бірінші орынға көтерілді.

Есепті 3-минутта Жанади Жумабек ашты, алайда қонақтар үзіліске дейін таразы басын теңестіріп үлгерді – Илья Горячих гол соқты. Барлығы матч соңында шешілді: 79-минутта Тимур Дешко алаң иелерін қайта алға шығарса, төрт минуттан кейін Жумабек дубль жасады.

Алматылықтар үшін бұл жеңіс реванш та болды – 7-турда «Жеңіс» оларды елордада 5:1 есебімен ойсырата жеңген еді.

«Жайық» «Жеңісті» басып озды

Астаналықтардың ұпай жоғалтуын «Жайық» та тиімді пайдаланды. Оралда Руслан Жангировтың командасы «Қызылжарды» 1:0 есебімен жеңді. Жалғыз голды 9-минутта Супьян Хасанов соқты.

Алаң иелері әлі де турнирдегі ең үздік қорғаныспен мақтана алады – 16 турда небәрі 13 гол жіберген.

Енді «Жайық» пен «Жеңістің» еншісінде 34 ұпайдан бар. Алайда екінші орында Орал командасы тұр – жеке кездесулердегі екі жеңісінің арқасында (2:0 және 1:0).

«Жетісудан» бес гол

Турдың ең нәтижелі матчы Балпық биде өтті. Онда «Жетісу» «Оқжетпесті» қабылдап, 5:1 есебімен жеңді.

Матчтың басы қонақтардың пайдасына өрбіді: 4-минутта Арсен Арапов есеп ашып, маусымдағы 10-голын соқты.

Алайда одан кейін ойын толықтай алаң иелерінің сценарийімен өрбіді. Адиль Амангазы дубль жасады, кейін Мади Салимов пен Айбын Даулетулы мергендік танытты, ал нүктені қосалқы құрамнан шыққан Тамирлан Смагул қойды – оған алаңда бір минуттың өзі жеткілікті болды.

Бұл – «Жетісудың» биылғы маусымдағы ең ірі жеңісі әрі бірінші айналымдағы 0:4 есебімен жеңілген матчтың қарымтасы. Екі командада да 26 ұпайдан бар, бірақ доп айырмасы бойынша төртінші орынды Көкшетау клубы сақтап қалды.

«Атырау» алтыншы орынға көтерілді

«Мұнайшылар» маусымдағы ең ірі жеңісіне қол жеткізіп, «Оңтүстікті» 4:0 есебімен ойсырата жеңді. Голдарды Ярослав Бортник, Аян Гарипулла, Нурсултан Жомарт және Ясин Алпамыс соқты.

Матч тағдыры үзіліске дейін-ақ шешілді: 44-минутқа қарай алаң иелері үш доп айырмасымен алда болды, ал 45-минутта қонақтар азшылықта қалды – Мейрамбек Жунис екінші сары қағазын алды.

«Атырау» 19 ұпаймен алтыншы орынға көтерілсе, «Оңтүстік» (18) жетінші орынға түсті. Келесі турда «Хан-Тәңіріді» қабылдайтын шымкенттіктер бірден екі ойыншысына сенім арта алмайды – алаңнан қуылған Жунистен бөлек, төрт ескерту жинаған Арнур Турдиев те дисквалификацияға байланысты ойынды өткізіп алады.

«Алтай» Семейде тағы да жеңісті уысынан шығарды

Турдағы жалғыз тең ойын аса драмалық жағдайда өтті. «Алтай» «Елімайға» қарсы қонақтағы кездесуде екі рет есепте алға шықты: алдымен 15-минутта Ярослав Вишневецкий гол соқты, ал Алибек Турысбек есепті теңестіргеннен кейін Кирилл Кенжигулов қонақтарды қайта алға шығарды.

Алайда турнир аутсайдері басымдығын сақтап қала алмады. 87-минутта Санжар Бекенов «Елімайға» тең нәтиже сыйлады – 2:2. Бір қызығы, 7-турдағы бұл командалардың кездесуінде де ұқсас жағдай болған: ол кезде «Алтай» 86-минутқа дейін 2:1 есебімен алда тұрғанымен, соңғы минуттарда екі гол жіберіп, ұпайсыз қалған еді.

16 турдан кейін «Алтайдың» еншісінде әлі де бір ғана жеңіс бар және команда 7 ұпаймен соңғы орында тұр. «Елімай» 16 ұпаймен сегізінші орында келеді.

Алда не бар

Маусымның аяқталуына екі тур қалды, ал көшбасшы үштік жүлделі орындарға кепілдік алды: ең жақын қуғыншы «Оқжетпес» (26) үшінші орыннан сегіз ұпайға қалып келеді.

Ал чемпион тек маусым соңында анықталады. «Хан-Тәңірі» (36) сырт алаңда «Оңтүстікпен» және өз алаңында «Атыраумен» кездеседі. «Жайық» (34) қонақта «Атыраумен», үйде «Оқжетпеспен» ойнайды. «Жеңіс» (34) өз алаңында «Елімайды» қабылдап, кейін қонақта «Жетісумен» кездеседі.

16-турдан кейінгі үздік сұрмерген: Жанади Жумабек («Хан-Тәңірі», 12 гол).
16-турдан кейінгі үздік ассистент: Нуралы Сабыржан («Оқжетпес», 6 нәтижелі пас).