Freedom QJ League U17 және U16: маусым қорытындылары

Freedom QJ League U17

Үш жас санатының да, сондай-ақ қыздар лигасының да үздік командасы болып алматылық «Қайрат» танылды.

Дегенмен, дәл осы U17 турнирінде «сары-қаралар» бір рет жеңілістің дәмін татты — жалғыз жеңілісті оларға «Ордабасы» сыйлады. Шымкентте өткен VII турдағы 3:2 есебімен аяқталған кездесудің басты қаһарманы дубль авторы Абылайхан Кенжадоев болды.

Маусым қорытындысы бойынша шымкенттіктер күміс жүлде иеленді. Олар чемпионнан небәрі бес ұпайға қалып қойды — 56 ұпай.

Сонымен қатар, «Қайрат» тек екі ойында жеңіске жете алмады — II турда «Каспиймен» (0:0) тең түсіп, «Ордабасыдан» жеңілді. Қалған барлық кездесулерде алматылықтар жеңіске жетті.

Қола жүлде «Шахтерге» бұйырды — 43 ұпай. Ал төртінші орында маусымды «Жас Қыран» (38 ұпай) аяқтады. Осылайша жүлдегерлер үштігі соңғы турға дейін-ақ анықталды.

Турнирдің үздік сұрмергені — Роман Черноморец («Қайрат»). 14 жастағы шабуылшы 20 матчта 21 гол және 6 нәтижелі пас тіркеді.

Ең көп голдық пас берген ойыншы — Расул Акимов («Шахтер»), оның еншісінде 19 кездесуде 13 пас және 7 гол бар.

Freedom QJ League U16

2010 жылы туған ойыншылар арасындағы «Қайрат» командасы өз турнирінде сенімді түрде жеңімпаз атанды — 56 ұпай. «Сары-қаралар» бірде-бір рет жеңілмегенімен, бес рет тең түсті — «Каспиймен», «Астанамен», «Қайсармен», «Ордабасымен» және «Жас Қыранмен».

Күміс медаль «Актобеге» бұйырды — «қызыл-ақтар» 44 ұпай жинады. Олардың вице-чемпион болуы «Ордабасы» командасының соңғы турдағы «Шахтермен» тең ойынының арқасында мүмкін болды. Шымкенттіктер сол нәтижемен үшінші орынға жайғасты.

Айта кету керек, жүлделі үштікке соңына дейін күрескен тағы бір команда — «Астана». Алайда шешуші матчта елордалықтар «Ордабасыға» жол беріп, тіпті соңғы турдағы «Жас Қыранды» жеңгенімен, медаль ала алмады. «Астананың» үздік бомбардирі — маусым ортасында ҚФФ Академиясына ауысқан Ануар Төленді.

U16 турнирінің «Алтын бутсысы» «Орда» шабуылшысы Бекасыл Канатқа бұйырды — 22 матчта 14 гол. Одан бір голға ғана қалып қойғандар — Алижан Зару («Қайрат») және Тимур Казанцев («Иртыш»).

Үздік ассистент атағын айқын басымдықпен Темірлан Әбжапар («Қайрат») иеленді — 19 матчта 17 нәтижелі пас.

Осы аталған ойыншылардың көпшілігі үшін Freedom QJ League-да жол енді ғана басталуда. Алдағы маусымдарда олар өз көрсеткіштерін жақсарта ала ма — уақыт көрсетеді.