Freedom QJ League W 13-турына шолу: күміс пен қола тағдыры әлі шешілмеді

«Астана» қатты тәуекелге баруда

Астаналық команда өз алаңында «Қайратты» жеңіп, күміс жүлдені ертерек қамтамасыз етуге тырысқанымен, нәтиже қонақтардың пайдасына шешілді – 3:5. 70-тен 90-минутқа дейінгі аралықта айырмашылық бар болғаны бір гол болды, сондықтан интрига соңына дейін сақталды.

Айта кету керек, алматылық футболшы қыздар жеңісті азшылықта жұлып алды – 20-минутта Милана Головкова қарсыласқа айқын гол соғу мүмкіндігінен айырғаны үшін тікелей қызыл карточка алды.

Жеңісті сапардың басты қаһармандары – Милена Николенко (хет-трик), Ангелина Остер (гол+пас), Оксана Никитченко (гол) және Жания Махаш (екі ассист). «Астанадан» Айзада Адилбек (1+1), Софья Рыбак және Зарэма Максот көзге түсті.

Үш бірдей жеңіліске қарамастан, астаналықтар әлі де турнирлік кестеде екінші орында тұр. Дегенмен, «Ертіс» өте жақындап қалды – сондықтан «Астанаға» соңғы турда «Шахтерді» жеңу аса маңызды.

«Тобыл» мен «Ордабасы» медальсіз қалады

Қостанайдағы матчта жеңімпаз анықталған жоқ – 6-минуттағы Амура Қарабаеваның жылдам голына оңтүстіктен келген қыздар Диана Ситникованың соққысымен (38’) жауап қатты. Есеп – 1:1. Бұл нәтижеден кейін алаң иелері де, қонақтар да үздік үштікке ену мүмкіндігінен айырылды.

Айта кетсек, «Ордабасы» соңғы турда «Жетісумен» Ситникованың көмегінсіз ойнайды – ол кездесудің соңғы минутында қызыл қағаз алып қалды.

«Ертіске» босаңсуға болмайды

Талдықорғанда өткен «Жетісу» – «Ертіс» ойыны 1:16 есебімен аяқталды – Лига тарихындағы ең ірі жеңістің рекорды қайталанды.

Анастасия Гордеева – пента-трик, Полина Арланова – хет-трик, Аружан Оспанова дубль мен екі пас берді. Сондай-ақ Айсана Ахмедиян (2+1), Аяжан Ислямғалиқызы (1+1), Сабина Айтжанова (1+1) және Валерия Косарева (1+1) нәтижелі болды. Қарсылас қорғаушысы Диана Құрметжанқызы автогол соқты.

«Жетісудың» абырой голын Балжан Төлеміс соқты.

Алайда, ірі жеңіске қарамастан, павлодарлық команда үшін жағдай әлі де қауіпті. «Актобеге» қарсы соңғы тур ойыны шешуші болады – жеңіс сәтті жағдайда күміске жеткізуі мүмкін, ал жеңіліс үздік үштіктің сыртында қалдыруы ықтимал.

«Шахтер» соңғыдан бір орын жоғарыда қалып қоюы мүмкін

Актобеде алаң иелері қонақтары – қарағандылық «золушкаларды» 2:1 есебімен жеңді. Азиза Талап пен Айжан Есіркепованың голдарына қонақтар Дамира Мақсат пен Саида Дюсембаеваның үйлесімді шабуылымен жауап қатты, бірақ теңестіру қолдарынан келмеді.

Қазір «Шахтер» турнирлік кестеде 7-орында тұр. Соңғы турда олар өз алаңында «Астанамен» кездеседі – бұл матч немен аяқталар екен?