Қызу тартыс күшейді: Freedom QJ League-тің 17-турынан не білу керек

«Мұнайшылардың» жолы болмады

«Атырау» өз алаңында «Қайсарды» қабылдап, күткендей-ақ тартысты ойын өткізді. Кездесу 2:2 есебімен тең аяқталды.
37-минутта алаң иелерінен қорғаушы Максат Муратов пенальтиден есеп ашты. Бірақ қонақтар үзіліске дейін таразы басын теңестіріп үлгерді – Жанболат Әзімхан көзге түсті. Екінші таймда Дінмұхаммед Бақытжан «Атырауды» қайта алға шығарды, алайда көп ұзамай Әлібек Жарылқасынұлы нәтижелі пас берген Әзімханның көмегімен есепті қайта теңестірді.

Айта кетерлігі, «Атырау» үш рет пенальти орындап, тек алғашқы соққысы ғана голға айналды.

«Астана» өз мүмкіндігін пайдаланды

Елорда клубы турнир кестесінде маңызды орын ауыстырды. «Иртышты» жеңгеннен кейін «Астана» төртінші орынға көтерілді.

6-минутта Абзал Сағын алғашқы голды соқты. Бірақ көп ұзамай Еламан Мүліков таразы басын теңестірді. Матчтың басты қаһарманы – Пак. Ол маусымдағы алғашқы хет-тригін жасады. Оның екінші голынан кейін «Шахтердан» ауысып келген Руслан Рахметов пенальтиден есепті қысқартты, алайда Пак үшінші голымен бәрін шешті – 4:2.

Қорытынды кезеңде екі команда да бір-бір ойыншыдан айырылды: Абзал Сағын мен Әлімжан Абдылық қатаң ойыны үшін екінші ескерту алып, алаңнан қуылды.

«Жас Қыран» жеңіс жолына қайта оралды

Сергей Киров шәкірттері екі ойындағы сәтсіздіктен кейін ес жиып, «Ақтөбені» тізе бүктірді. Бірінші тайм голсыз өтті. Екінші таймда Арафат Вәлиев пен Бекжан Хафизов нәтижелі соққыларымен жеңісті тарту етті. «Ақтөбе» жауапсыз қалды. Бұл – «қызыл-ақтылардың» қатарынан төртінші жеңілісі. Келесі турда олар «Атыраумен» кездеседі.

Макридов рекордқа жақындап келеді

«Шахтер» «Каспийді» ойсырата жеңді – 5:0. Рамазан Орал дубль жасады, қалған голдарды Глеб Макридов, Ерасыл Амалбаев және Илья Гезик соқты.

Осылайша «кеншілер» турнир кестесінде екінші орын үшін күресті жалғастыруда. «Жас Қыраннан» олар небәрі бір ұпайға қалып тұр.

Глеб Макридовтың еншісінде – 14 гол. Оған әлі бес ойында бес рет гол соғу қажет. Сонда ол Freedom QJ League тарихындағы үздік сұрмерген Дастан Сатпаевпен теңеседі.

Ортаңғы топтағы алшақтық артты

«Ордабасы» оңтүстіктегі дербиде «Таразды» 4:1 есебімен жеңді. Жанәлі Есенәлиев екі рет пенальтиден дәл соқты. Ал ойында Тимур Рахимов пен Құдірет Ботабек көзге түсті – екеуіне де Дінмұхаммед Махмұдов пас берді. Қонақтардан Еркебұлан Науханбай ғана бір гол соқты.

Енді турнир кестесінде алтыншы және жетінші орын арасындағы айырмашылық тоғыз ұпайға жетті. Келесі турда «Ордабасы» Талант Қуанышсыз ойнайды – қорғаушы алаңнан екі рет ескерту алып қуылды.

Қостанайда сенсация болған жоқ

«Тобыл» «Қайратқа» қарсы тосынсый жасай алмады. Турнирдің көшбасшысы алаң иелерін 2:0 есебімен жеңді. Санат Нұрболат пен Даулет Орынбасар гол соқты.

Бұл матчта Орынбасар өзінің бомбардирлік көшін нығайтты – енді оның еншісінде 17 гол. Оның әріптесі Абылай Төлеухан 15 голмен екінші орында, ал «Шахтердан» Глеб Макридов 14 голмен үшінші сатыда тұр.