Қазақстан U-17 құрамасының бас бапкері Бауыржан Сағындық: «Бірнеше ойыншы скауттардың назарын аударды»

Қазақстан құрамасы топтық кезеңде Иран жасөспірімдер құрамасын (2:0) жеңіп, болашақ чемпиондар – Ресей құрамасымен (1:1) тең ойнады және Әзербайжанға (1:2) есе жіберді. Нәтижесінде, команда соңғы матчта Бразилияның BCS Academy ұжымын жеңіп, бесінші орынға ие болды.

Қазақстан құрамасының аға жаттықтырушысы және Freedom QJ League сарапшы-аналитигі Бауыржан Сағындық турнирдің қорытындысын шығарды.

– «Даму кубогы» біздің командамыз үшін пайдалы турнир болды. Төрт матчта біз белсенді, комбинациялық футбол көрсетуді мақсат тұттық, прогрессивті әрекеттер мен жоғары прессингті жетілдіруге жұмыс жасадық. Ең маңыздысы – жігіттер белгіленген ойын қағидаларын ұстануға және әртүрлі қарсыластарға бейімделуге тырысты.

– Қай қарсылас ең қиын болды?

– Әзербайжан деп айтар едім. Бұл жүлдегерлер қатарына ену үшін өткен ойын болды. Осы кездесуде жеңіске жету үшін бізге кейбір ұсақ-түйек жайттар жетіспеді, бірақ жігіттер соңына дейін күресті.

– Freedom QJ League ойыншыларының ішінде бұл турнирде өзін ең жақсы көрсеткен кім? Маусымаралық кезеңде кімнің прогресі ең әсерлі болды?

– Турнир тағы да халықаралық жарыстар мен Лиганың ойыншылардың дамуы үшін маңызды үйлесім екенін дәлелдеді. Тұрақты ойын тәжірибесі мен мықты қарсыластарға қарсы ойнау футболшыларға бейімделуге және өрлеуге көмектеседі.

Жақсы деңгейді Абылай Төлеухан мен Дәулет Орынбасар көрсетті, бірақ жалпы алғанда, бүкіл команданың өсуі байқалады. Лигадағы жұмыс негізгі іргетас болып табылады, ал халықаралық турнирлер дайындық деңгейін тексеруге мүмкіндік береді. 5-6 ойыншы скауттардың назарын аударды, бұл біздің даму бағытымыздың дұрыс екенін көрсетеді. Жүйе жұмыс істеп тұр, футболшылар күшейіп келеді.