«Қайрат» жыл басынан бері алғаш рет гол өткізіп алды, «Ертіс» бен «Каспий» ұпай жинады: Freedom QJ League-нің 5-турынан репортаж

«Қайрат» ҚФФ Академиясын талқандады – бірақ маусымдағы алғашқы голды өткізіп алды

Әрекеттегі чемпиондар туған стадионында ҚФФ Академиясына ірі есеппен (5:1) жеңіліс сыйлады.

Барлық гол әр түрлі ойыншылардың аяғынан құйылды. «Сары-қаралар» сапынан Роман Черноморец, Дәулет Орынбасар («гол+пас» бойынша 1+1), Абылай Жылқайдар (11 метрлік айыппұл соққысынан), Абылай Төлеухан және Төре Исмағұлов гол соқты.

Қонақтардың жалғыз голын 15 жасар Ануар Төленді есебіне жазды. Ол осы маусымдағы бас турнирде «Қайрат» қақпасына доп жіберген тұңғыш ойыншы болды – голға дәл пас берген 2010 жылы туған тағы бір футболшы Платон Шипицин еді.

«Жас Қыран» ұпай жоғалтты

5-тур қорытындысы бойынша «Қайрат» турнир кестесінің жалғыз көшбасшысына айналды – бұған дейін «сары-қаралармен» бірге басты бөлісіп тұрған «Жас Қыран» «Ордабасымен» тең ойнады. Шымкенттегі ойын гол соғылмастан аяқталды.

Бұл – ағымдағы маусымдағы бас турнирдегі екінші ғана тең ойын екенін атап өтейік: өткен демалыста «Ақтөбе» мен «Шахтер» 1:1 есебімен ажырасқан болатын.

Турнир кестесіндегі алшақтық арта түсуде

«Шахтер» қайтадан жеңіс жолына түсті – «кеншілер» Расул Акимовтың дублі арқасында «Тобылды» сенімді түрде (2:0) ұтып шықты. Екі жағдайда да жартылай қорғаушыға Дәмір Юсупбеков ассистенттік етті.

Бұл Акимовтың осы маусымдағы екінші дубль екенін еске сала кетейік – бұған дейін ол 2-турда «Астана» қақпасын екі рет дүркіреткен.

Енді 13 ұпайы бар «Шахтер» үшінші орында қалып, төртінші орыннан алшақтай түсті – қазіргі ең жақын бәсекелесі 7 ұпайы бар «Ордабасы».

«Тараздың» оңайға соқпаған үш ұпайы

«Тараз» «Ақтөбені» оңай ұтпай, 2:1 есебімен жеңді. Қызығы – матчтың алғашқы минуттарында алға «қызыл-ақтар» шықты, Ахан Ерболұлының автоголы есебінен. Алайда оңтүстіктіктер бірінші таймда-ақ Расул Нұрманбайдың 11 метрлік соққыдан соққан голымен есепті теңестірді, ал үзілістен кейін сол ойыншы екінші, жеңіс әперген голды соқты.

Нұрманбай қатарынан төрт матчта гол соғып келеді – Fantasy QJ League ойыншылары Расулға назар салса жөн болар.

«Ертіс» бен «Каспийдің» алғашқы жеңістері

Өткен турға дейін ұпай жинай алмай жүрген екі команда күткен жеңістерімен жанкүйерлерін қуантты.

«Каспий» Ақтаудағы ойында «Қайсарды» жауапсыз екі гол соғып ұтты. Екі эпизодта да Әлихан Жұмабай маңызды рөл атқарды – алдымен 5-минутта 11 метрлік соққыны сәтті орындады, кейіннен бірінші тайм соңында Ануар Ұзақбайға голға тиімді пас берді.

Үй иелеріне жеңіс есебін сақтап қалуға екінші таймда «қасқырлардан» екі ойыншының (Мәди Жеңісұлы мен Сәмір Бақытжан) қуылуы көмектесті.

Ал «Ертіс» үй қабырғасында «Астананы» 3:0 есебімен ұтты. Голдарды Тимур Титаренко, Мадияр Есен және Темірлан Теміргалиев соқты. Қонақтар сапынан 87-минутта Әли Аскербеков қуылды.

Енді павлодарлықтар турнир кестесінде соңғы алдындағы 11-орынды иеленеді. Алайда 12-орында үш ұпайы бар әрі ҚФФ Академиясымен ойынды резервте сақтап тұрған «Қайсар» тұр. Қалай дегенмен, үздік үштіктен тыс кесте әлі де өте тығыз: «Ертіс» төртінші орыннан небәрі төрт ұпайда. Дәл осындай жағдай оныншы орындағы «Каспийде» де.

5-тур қорытындысы бойынша үздік бомбардир: Дәулет Орынбасар («Қайрат», 6 гол)

5-тур қорытындысы бойынша үздік ассистенттер: Дияр Рахимжанов («Ордабасы»), Алан Луканин («Жас Қыран»), Төре Исмағұлов және Абылай Төлеухан (екеуі де – «Қайрат», 3 пастан).