Карабаева орындауындағы «құрғақ жапырақ» және «Шахтер» аруларын шым қала ыстығынан құтқарған бас орамал: Freedom QJ League W 3-турының шолуы

«Тобол» жеңсе қарсыластар қақпасына голды жаңбырша боратады!

Қостанайлық футболшы қыздар маусымдағы алғашқы үш ұпайларын еншілеп, өз алаңында «Жетісуды» ірі есеппен жеңді. «Тобыл Аренада» өткен ойында олар қарсыластар қақпасына жауапсыз сегіз гол соқты. Амура Карабаева мен Алина Сартаева дубль авторлары атанса, Диана Нұрқабаева, Әсем Доскеева, Варвара Цой және Әсел Санат қанжығаларын бір голмен майлады.

6-минутта соғылған алғашқы голды ерекше атап өткен жөн — Амура Карабаева бұрыштамадан асқан шеберлікпен допты тура қақпаға бағыттап, әдемі «құрғақ жапырақ» иесі атанды.



«Қайрат» қосымша көрсеткіштер бойынша көшбасшылығын сақтап тұр

Алматылық команда қарсыластарын ірі есеппен жеңуді жалғастыруда. Сары-қаралар өз алаңында «Ертісті» 4:1 есебімен қапы қалдырды.

София Ягудина дубль жасап cұрмергендер көшін бастап тұр. Сонымен қатар, қос Ангелина – Остер мен Клёнова – бір-бір голдан соғып, көзге көрінді. Қонақтар сапынан Елизавета Медведева «жұбаныш» голын соғып, есепті қысқартты.

Бандана таққан бойжеткендердің төрт голы

«Ордабасы» мен «Шахтер» тартысты ойын өткізіп, бұл кездесуде шымкенттік арулар маусымдағы алғашқы жеңілісіне ұшырады. Аруна Насирали 12-минутта есепті ашқанымен, қарағандылық футболшы қыздар үзіліске дейін небәрі 13 минут аралығында жауапсыз  үш гол соғып, таразы басын өз еншілеріне аударды. Саида Дюсембаева, Толғанай Амантай және Малика Сәрсен мергендігімен көзге көрінді.

Үзілістен кейін Насирали мен Ситникова тағы да сәтті шабуыл ұйымдастырып, есепті бір голға дейін қысқартты. «Ордабасы» камбэк жасайды деген үміт туған еді, деседе 51-минутта Дамира Мақсат ойын нүктесін қойып, «Шахтердің» жеңісін айқындады — 2:4.

Айта кету керек, «Ордабасы» есепті 7-минутта-ақ аша алатын еді, алайда Диана Ситникова орындаған пенальти маңдайшаға тиіп, бұл сәт голсыз аяқталды.

Саида Дюсембаева осы маусымда өткен үш турдың әрқайсысында кем дегенде бір гол соғып жүр — ол әзірге әр матчта нәтижелі ойын көрсетіп келе жатқан жалғыз ойыншы.

Сонымен қатар, матчтың тағы бір қызық сәті — қарағандылық футболшы қыздардың бандана тағып шығуы болды. Шымкенттің аптап ыстығынан осылай қорғанған қонақтар, Дамира Мақсаттың айтуынша, дәл осы стильді орамалдардың жеңіске әсері зор екендігін атап өтті.

«Астаналық» ару джокер «Ақтөбеге» қарсы ойында командасына жеңіс сыйлады

Елордада өткен кездесуде Freedom QJ League W тарихындағы алғашқы тең ойын тіркелетіндей көрінген еді. Алайда, бұл сәт әзір келмеді. Матч тағдырын 82-минутта 14 жастағы Софья Рыбак шешіп кетті. Нәтижелі пас авторы — Әлзия Жамбыл. Бұл – «Астананың» турнир аясындағы Асыл Пазыл қатыспаған алғашқы голы.

Айта кету керек, Рыбак алаңға тек 55-минутта шыққан болатын, яғни ол өте қысқа уақытта маңызды жеңіс голын соғып, командасына үш ұпай сыйлады.

Осылайша, тур соңында «Астана» мен «Қайрат» – әзірге ешқандай ұпай жоғалтпаған жалғыз командалар болып қала бермек. Екеуінің де еншісінде тоғыз ұпайдан бар.