«Қызылжар» КФФ Академиясынан ұпай тартып алды, Қалымжанов жарқырады: Freedom QJ League B 7-турындағы маңызды сәттер

КФФ Академиясының сүрінуі

«Қызылжар» фавориттерден ұпай тартып алуды жалғастырып жатыр – бұл жолы Петропавл ұжымы КФФ Академиясымен тең түсті.

Стюарт Холл баптайтын команда өз алаңында 67-минутта есеп ашты – Платон Шипицин пенальтиден дәл соқты. Осы минималды басымдық негізгі уақыттың соңына дейін сақталды – алаң иелері кезекті жеңіске жететіндей көрінген.

Алайда бәрі қосымша минуттарда өзгерді – Даниял Ешкеев бұрыштамадан кейінгі сәтті пайдаланып, таразы басын теңестірді. Осылайша, «Қызылжар» турнирлік кестенің төменгі бөлігіндегі ең қайсар команда атанды – бір жеңіс, бір жеңіліс, бес тең ойын.

Андрей Селиверстов шәкірттерін жеңе алған жалғыз команда – Талдықорғанның «Жетісуы». Бұл өткен турда болған.

«Оңтүстік» алтын үшін күресті жалғастыруда

Шымкенттің «Оңтүстігі» чемпиондық таласқа қайта қосылу мүмкіндігін жіберіп алмады – Андрей Вагановтың командасы өз алаңында «Жетісуды» сенімді түрде жеңді. Гол авторлары: Оралхан Құлмурат, Қайсар Мәлік және Алихан Әлі. Жетісулықтар тек Рахат Дүйсеннің құрмет голымен жауап қатты.

Енді чемпионаттың қос көшбасшысы – «Оңтүстік» пен КФФ Академиясының 16 ұпайы бар, бірақ қосымша көрсеткіш бойынша шымкенттіктер жоғары тұр.

Тамирлан Қалымжанов үшін сәтті апта

Алихан Әлі гол мен пас жүйесі бойынша маусымның үздік ойыншысы атанып келеді – 9 гол және 3 ассист. Бірақ бомбардирлік жарыста бәсекелес пайда болды.

«Оқжетпес» «Елімайды» 5:0 есебімен тас-талқан етіп, жүлдеге таласу мүмкіндігін сақтап қалды. Көкшетаулық ұжымның бес голының үшеуіне Тамирлан Қалымжанов тікелей қатысып, бірінші таймның соңында дубль жасады, ал 70-минутта Пётр Попадюкке нәтижелі пас берді.

Енді Тамирланның да есебінде 9 гол – бұл Алиханмен бірдей. Ассист саны жағынан аздап артта – 2 қарсы 3.