Сенсациялар бола ма? Freedom QJ League-нің 9-турының алдын ала шолуы

«Ақтөбе» – «Тараз»: туған алаң «қызыл-ақтарға» көмектесе ме?

Алдыңғы турда өз алаңында «Атырауды» жеңген «Тараз» енді Батыстың тағы бір клубымен — «Ақтөбемен» сырт алаңда ойнайды.

Турнирлік кестеде алтыншы орында тұрған Аскар Күшікбаев шәкірттері жүлделі үштікпен арақашықты 4 ұпайға дейін қысқартуға ниетті. Сондықтан бұл ойында ұпай жоғалтпау — олардың басты мақсаты.

Айта кетейік, 2-турда «Ақтөбе» өз алаңында «Астанадан» ұпай тартып алған. Сол себепті бұл матч қызықты болары анық.

«Шахтер» – «Қайсар»: амбицияға сынақ

Қарағандылықтар алдыңғы турда «Астанамен» болған ойында жеңісті уыстан шығарып алды — олар алғашқы тайм соңына дейін 2:0 есебімен алда келе жатқан еді. Соған қарамастан, тең есеп «Шахтерді» үздік үштікте қалдырды.

Ал «Қайсар» өз кезегінде маусымдағы екінші жеңісін тіркеді — бұл жолы «Ақтөбені» жеңді. Ол ойында Әлібек Жарылқасынұлы гол соғып, бір нәтижелі пас берді. Қайталай ала ма?

«Ордабасы» – «Ертіс»: шымкенттіктер жүлде жарысына орала ма?

Шымкент командасы қатарынан үш жеңіліске ұшырады, ал павлодарлық «Ертіс» соңғы турда «Тоболды» ірі есеппен жеңіп, сәтсіздік кезеңін тоқтатты. Дегенмен, «Ертіс» көшбасшы «Астана» мен «Шахтерден» жеңілсе, «Ордабасы» «Тараз», «Қайрат» және тіпті «Каспий» секілді командалардан ұтылды.

Өткен турда үш нәтижелі әрекет жасаған Бейбарыс Әбілманов пен Алмас Рахымбектің ойыны қызықты болады. Ал «Ордабасы» шабуылшысы Жанәлі Есенәлиев бұрынғы бабына орала ала ма?

«Жас Қыран» – «Каспий»: ақтаулықтардан тағы бір тосынсый бола ма?

Алматылықтар әлі жеңіліс көрген жоқ: өткен турдағы «Қайратпен» болған дерби 2:2 есебімен аяқталды.

Сергей Киров шәкірттері енді маусымдағы алғашқы жеңісіне қол жеткізген «Каспиймен» кездеседі — команда жеті тур қатарынан жеңілген еді. Ақтаулықтар жанкүйерлеріне тағы бір сыйлық жасай ала ма?

«Атырау» – «Қайрат»: алматылықтар қандай қорытынды жасады?

Алдыңғы турда алғаш рет ұпай жоғалтқан «сары-қаралар» енді қайтадан жеңіске оралуға тырысады.

Ал «Атырау» қиын кезеңді бастан өткеруде: бес матчтық жеңіліссіз сериядан кейін команда қатарынан екі рет жеңілді — «Ақтөбе» мен «Тараздан». Алайда олар бұған дейін «Шахтер» мен «Жас Қыраннан» ұпай тартып алған. Талғат Қажығалиевтің жоспары іске аса ма? Жақында білеміз.

«Тобол» – «Астана»: болжап болмайтын кездесу

Астаналықтар соңғы турларда әртүрлі нәтиже көрсетті: «Каспийден» 2:1 есебімен аз айырмашылықпен жеңсе, «Қайсарды» 10:0 есебімен тас-талқан етті. «Тобол» үшін бұл оңай матч болмайтыны анық – олар сегіз турда тек бір рет, «Каспийге» қарсы ғана жеңіске жеткен.

Алдыңғы аптада «Астана» «Шахтермен» болған маңызды ойында әрең дегенде жеңілуден құтылды. Бұл олардың алдағы ойынға қалай әсер етеді — бірге көрейік.