Сәрсенбі күні Қостанайдағы «Тобыл Аренада» ССБ (Спорттық-сараптамалық бөлім) «Болашақ ойыншысы» жобасы аясында осы маусымдағы алғашқы жаттығу өтті.
Оның басты қатысушысы «Тобыл» U-15 командасының 14 жасар шабуылшысы Артур Гарифуллин болды.
Freedom QJ League U-15 лигасының алғашқы бес турында Гарифуллин жеті гол соғып, бір нәтижелі пас берді. Бүгінгі таңда ол алаңда жалпы алғанда 323 минут өткізді – бұл Артурдың орта есеппен әр 40 минут сайын нәтижелі әрекетімен көзге түсетінін білдіреді.
Жеке жаттығу жиыны шабуылдың соңғы кезеңіндегі дағдыларды шыңдауға бағытталды – мұндай екпін Гарифуллиннің алдыңғы матчтардағы ойынын бақылау қорытындысы бойынша таңдалды.
Жаттығу Pixellot «ақылды» камерасына жазылып, жаттығу үдерісін ұйымдастыру үшін әзірленген Лиганың FF Manager төл цифрлық платформасының көмегімен егжей-тегжейлі талданды.
«Біз өз жобамыздың аясында жаттықтырушылар штабымен бірлесе отырып, қатысушылар тізімін жасаймыз және әрқайсысы бойынша жеке даму жоспарын құрамыз.
Командалық жаттығулар – бұл бапкердің назары жалпы көрініске аударылатын жұмыс. Ал жеке қосымша сабақтар нақты бір ойыншыға қажетті бөлшектерге бағытталады», – деп атап өтті Лиганың Спорттық-сараптамалық блогының сарапшысы және «Болашақ ойыншысы» жобасының жетекшісі Александр Князев.
Жақын арада ССБ өкілдері Шымкент пен Астанада семинарлар өткізеді, онда Артур Гарифуллиннің жеке жаттығу тәжірибесі FF Manager пен «Болашақ ойыншысы» бағдарламасының жаңа мүмкіндіктерінің әлеуетін көрнекі түрде көрсететін болады.
Еске сала кетейік, маусымашар алдындағы ауқымды сұхбатында блоктың жетекшісі Бауыржан Сағындық футболшылардың жекелей дамуын жұмыстағы жаңа стратегиялық бағыт ретінде белгілеген болатын.
Жаңа үш жылдық кезеңде OVR Performance жабдықтары, Pixellot «ақылды» камералары, GPS-трекерлер, FF Manager және басқа да озық құралдардың көмегімен физикалық көрсеткіштерді зерттеуге ерекше мән беріледі. Ұзақ мерзімді мақсат – 2029 жылға қарай жас қазақстандық футболшылардың фитнес-профильдері қамтылған ауқымды деректер базасын қалыптастыру.
